Gwamnan jihar Bauchi Sanata Bala Muhammad ya sauke tare da rushe dukkanin shugabannin riko na kananan hukumomi 20 na jihar tare da mataimakansu nan take.
Bayanin hakan na kunshe ta cikin kwafin sanarwar manema labaru daga fadar gwamnatin jihar wacce ta fitar a yamamcin nan dauke da sanya hannun sakataren gwamantin jihar Muhammad Sabiu Baba.
Fadar mulkin jihar ta shaida cewar sauke shugabanin rikon na zuwa a sakamakon sanya ranar gudanar da zaben shugabannin kananan hukumomi da hukumar zabe ta jihar ta yi, suna masu cewa yin hakan na daga cikin dokoki da ka’idojin gudanar da zaben.
A cewar sanarwar gwamna Bala Muhammad ya dauki wannan matakin ne domin baiwa dukkanin masu sha’awar tsayawa takara damar shiga a dama da su wajen neman neman kujerun a fadin kananan hukumomi 20 da suke jihar.
Gwamna Bala Muhammad ya umurci shugabanin rikon da za su bar kujerarsu da su mika ragamar mulkin kananan hukumominsu ga manyan jami’an kananan hukumomin.
A gefe daya gwamnan ya gode musu a bisa riko kananan hukumomin da suka yi na dan lokaci, ya kuma yi musu fatan alkairi dukkaninsu.
