Kungiyar Gwamnonin Ci Gaba (PGF) na jam’iyyar (APC) ta yanke shawarar ci gaba da rike shugabancin kasa na jam’iyya na yanzu, tare da kin daukar kowanne mataki na sake rabon manyan mukamai.
An cimma wannan shawara da safe a ranar Litinin, bayan taron da ya kare kusan karfe 1:45 na daren ranar a Legas.
- Idan Ana Fatan Cimma Nasara A Matakin Kasa Da Kasa, Wajibi Ne A Zabi Kasar Sin
- Ya Kamata Sin Da Amurka Su Kaucewa Takara Mai Hadari
Shugaban kungiyar kuma Gwamnan Jihar Imo, Hope Uzodimma, wanda ya yi wa ‘yan jarida bayani bayan taron, ya ce gwamnonin sun amince cewa babu hujja da za ta sa a canza tsarin shugabancin jam’iyya yayin da Shugaba Bola Ahmed Tinubu ke kan kujerarsa.
Ya bayyana cewa taron ya kuma duba abubuwan da ke faruwa a Iran da tasirinsu ga tattalin arzikin Nijeriya, musamman a fannin makamashi da hanyoyin samar da kayayyaki na duniya.
A cikin sanarwar da aka fitar a karshen taron, wanda Uzodimma ya sa hannu a kai, kungiyar ta ce ta tattauna kan ci gaban kasa, nauyin shugabancin jihohi, da rawar da gwamnonin ci gaba ke takawa wajen fassara gyare-gyaren gwamnatin tarayya zuwa amfani ga ‘yan kasa.
Gwamnonin sun sake tabbatar da jajircewarsu ga daidaiton dimokuradiyya, mulki bisa ka’ida, da Shirin Fatan Sabuntawa na gwamnatin Tinubu.
Sun bayyana cewa kafin taron, ‘yan kungiyar sun ziyarci Shugaba, inda tattaunawa ta ta’allaka kan tsaro, gyare-gyaren tattalin arziki, jin dadin jama’a, ci gaban ababen more rayuwa, tsarin abinci, da karfafa hadin gwiwar tarayya da jihohi.
“Kungiyar ta lura cewa ziyara ta baya-bayan nan da Shugaba ya kai Birtaniya wani bangare ne na babban shirin diflomasiyya na tsaro da ci gaba, kuma ta yi maraba da tabbacin ci gaba da huldar kasa da kasa wajen magance matsalolin tsaro da bunkasa manufofin ci gaba,” in ji sanarwar.
Gwamnonin sun kuma gode wa Shugaba kan “bayyananniyar manufa, gaskiya a cikin shugabanci, da jajircewarsa wajen gina kasa mai karfi.”
Kan batutuwan kasa, kungiyar ta duba yanayin siyasa, tattalin arziki da tsaro, inda ta lura cewa gyare-gyare sau da yawa suna zuwa da kalubale amma suna da muhimmanci don daidaito da ci gaba na dogon lokaci.
Ta jaddada bukatar hadin kai mai karfi tsakanin gwamnatocin tarayya da na jihohi, musamman a muhimman sassa kamar noma, makamashi, sufuri, lafiya da ilimi, yayin da ake kiyaye ‘yancin jihohi.
Kan tattalin arziki, kungiyar ta amince da wahalhalun da ke tattare da gyare-gyaren da ake yi amma ta jaddada cewa nasarar su ya kamata a auna ta ingancin rayuwar ‘yan Nijeriya.
Ta gargadi cewa rikicin da ke ci gaba a yankin Gulf na iya kara hauhawar farashi da tsadar kayan aiki, tare da kira ga hadin gwiwa don kara samar da abinci, tallafa wa kananan ‘yan kasuwa da fadada shirye-shiryen jin dadin jama’a.
Gwamnonin sun kuma sake jaddada cewa tsaro shi ne ginshiki ga ci gaban kasa, tare da kiran a ci gaba da saka hannun jari a fannin leken asiri, fasaha, kula da iyakoki da tsarin gargadin gaggawa a matakin al’umma.
