Jigo a jam’iyyar ADC, Dele Momodu, ya ce tsohon shugaban ƙasa Olusegun Obasanjo na iya kasancewa yana goyon bayan tikitin takarar Peter Obi da Rabiu Musa Kwankwaso a zaɓen shugaban ƙasa na shekarar 2027. Momodu ya bayyana hakan ne yayin wata hira da gidan talabijin na News Central TV.
Momodu, wanda ya taɓa neman takarar shugaban ƙasa kuma mawallafin mujallar Ovation, ya ce bayanan da ya samu daga majiyoyi masu inganci sun nuna cewa hankalin Obasanjo ya karkata ga haɗakar Obi da Kwankwaso maimakon tsohon mataimakin shugaban ƙasa Atiku Abubakar. Ya ce hakan ya ba shi mamaki idan aka yi la’akari da tarihin siyasar Obasanjo da Atiku.
Ya ƙara da cewa tun bayan da Obasanjo ya mara wa Atiku baya a zaɓen shugaban ƙasa na 2019, ya yi zaton an kawo ƙarshen saɓanin siyasar da ya daɗe yana tsakaninsu. Sai dai ya ce bai san abin da ya sake tayar da rikicin ba.
Duk da haka, Momodu ya jaddada cewa goyon bayan Obasanjo ba shi ne zai yanke hukuncin wanda zai lashe zaɓen 2027 ba. A cewarsa, idan Allah ya ƙaddara Atiku Abubakar zai zama shugaban ƙasar Nijeriya, babu wani ƙarfin da zai iya hana hakan faruwa.
Momodu ya kuma bayyana cewa zaɓen shugaban ƙasa na 2027 ana sa ran zai kasance mai zafi, inda ake hasashen manyan ‘yan siyasa kamar Shugaba Bola Ahmed Tinubu, Atiku Abubakar da Peter Obi za su taka muhimmiyar rawa a fafatawar.
