Magidanci Ahmed Abubakar Zakka tare da matarsa da jaririyarsu mai watanni shida a duniya mai suna Fatima, sun kuɓuta daga hannun ƴan bindigar da suka yi garkuwa da su a Jihar Kaduna bayan kwanaki tara suna tsare a daji. Majiyoyi sun tabbatar da cewa an sako iyalan ne a ranar Alhamis, 15 ga watan Oktoba, 2026, kuma tuni suka nufi cikin birnin Kaduna domin sake haɗuwa da ƴan uwansu.
Ko da yake ba a bayyana cikakkun bayanan yadda aka kuɓutar da su ko kuma an biya kuɗin fansa ba, wani tsohon jami’in tsaro mai ritaya wanda ya yi aiki tare da tawagarsa domin ganin an ceto su, ya tabbatar da labarin ga manema labarai.
Rahoton Daily Trust ya Jami’in ya nuna cewa ƙoƙarin tawagarsa da gudunmawar wasu mutane ne suka share fagen kuɓutar da su, inda ya ƙara da cewa iyalan na kan hanyarsu ta komawa gida a cikin motarsa tare da direbansa.
Bayanai dai sun nuna cewa ƴan bindigar sun sace Zakka da matarsa da jaririyarsu ne daga gidansu da ke rukunin gidaje na Alrahus Estate a yankin Millennium City, cikin Ƙaramar Hukumar Chikun ta Jihar Kaduna, a ranar 6 ga watan Oktoba, 2026. Ma’auratan, waɗanda aka bayyana a matsayin marayu, sun shafe kusan shekaru shida da aure ba tare da samun haihuwa ba har sai kwanan nan da suka haifi Fatima.
Sace iyalan ya haifar da gagarumar fargaba da fushin al’umma a faɗin ƙasar, biyo bayan watsuwar wani faifan bidiyo mai ban tausayi a kafafen sada zumunta. Bidiyon ya nuna jaririyar Fatima tsirara tana kuka mai tsanani a hannun mahaifinta, yayin da wani ɗan bindiga ya saita bindiga a kansa a yayin da ma’auratan ke roƙon a ji ƙansu tare da kiran hukumomi da jama’a su kawo musu ɗauki.
Kuɓutar da iyalan ta kawo gagarumin sauƙi da farin ciki ga ƴan uwa da ɗaukacin ƴan Nijeriya da suka shafe kwanaki suna gudanar da addu’o’i da matsin lamba ga jami’an tsaro domin ceto su, a daidai lokacin da al’ummomin yankin Chikun ke ci gaba da fuskantar barazanar hare-haren ƴan bindiga.
