Nasarar da samfurin babura na kasar Sin wato ZXMoto ta samu a gasar tseren babura ta duniya ta WSBK ta 2026, ta karya baba-keren da samfuran kasashen Turai, da Amurka da Japan suka yi. A ran 9 ga watan nan da muke ciki, kamfanin dillancin labarai na Faransa AFP ya rawaito cewa, ZXMoto tana jagorantar samfuran Sin wajen shiga kasuwar babura ta duniya.
Rahoton ya ce, wannan kamfani da aka kafa shekaru biyu kacal, ya kera babura masu rahusa idan an kwatanta da na abokan takararsa na sauran kamfanoni, amma duk da haka, ya kai ga fafatawa da manyan kamfanoni na Turai kamar Ducati, da na Japan kamar Yamaha da Honda da sauransu. A kasar Sin, ana kallon Zhang Xue a matsayin alamar karfin masana’antar Sin, kuma magoya bayansa suna sha’awar labarin yadda ya fara aikinsa ba tare da samun wani fifiko ba da yin nasara daga babu.
Rahoton ya yi amfani da kalaman masanin masana’antar motoci Bill Russo, wanda ya taba cewa, samfuran babura na Sin za su fadada shiga kasuwannin duniya ta hanyar kulla hadin gwiwa, da zuba jari, da kafa sassansu a kasashen waje, ba wai ta hanyar fitar da kayayyaki kadai ba. (Amina Xu)
