An ruwaito cewa kamfanin kera motoci na kasar Jamus Mercedes-Benz ya shigar da dan wasan tawagar Nijeriya da Galatasaray Bictor Osimhen kara a gaban wata kotu dake kasar Italiya kan zargin rashin kammala biyan kudin wata motar da ya saya a lokacin zamansa a kungiyar kwallon kafa ta Napoli.
A halin yanzu Osimhen yana daya daga cikin ‘yan wasan gaba mafi kwarewa a kwallon kafa a Duniya, ya taka leda a manyan kasashen Turai da suka hada da Belgium, Faransa, Italiya, da kuma Turkiyya, duk da haka, manyan nasarorin da ya samu sun zo ne a lokacin da ya lashe gasar Serie A ta kasar Italiya da kuma gasar Süper Lig ta kasar Turkiyya, inda ya lashe gasar tare da kungiyoyin Napoli da Galatasaray, bi da bi.
A lokacin zamansa na shekaru hudu da Napoli, Osimhen ya jagoranci kungiyar wajen lashe gasar Scudetto a karon farko cikin kusan shekaru 40, saboda wadannan nasarorin, komawarsa Galatasaray a bazarar da ta gabata ya sa ya zamo dan wasan da ya fi kowane dan wasan karbar albashi a tarihin gasar ta kasar Turkiyya da ake kira Turkish Süper Lig.
Tauraron Super Eagles din a halin yanzu yana samun Yuro miliyan 20 a kowace shekara a matsayin albashi a Galatasaray, Osimhen ya samu yabo saboda ayyukansa na taimakon jama’a, yana yawan tallafa wa iyali, abokai, har ma da wadanda bai sani ba a shafukan sada zumunta, a karshen makon da ya gabata, ya dauki nauyin wasu magoya bayan Nijeriya domin su halarci wasan da Galatasaray ta doke kungiyar Fenerbahce da ci 3-0.
A cewar wani rahoto da jaridar Napolista ta fitar, Mercedes-Benz ta sanar da hukumomin Italiya game da bashin da take bin Osimhen, kamfanin ya yi ikirarin cewa Osimhen ya gaza kammala biyan kudin da ya sayi wata mota a shekarar 2023 kuma ya ki ya dawo da motar bayan ya kasa biya, sakamakon haka, ana zargin cewa dan wasan gaban mai shekaru 27 ya tara bashin Yuro 90,000 (kimanin Naira miliyan 142), wannan lamari ya bai wa mutane da dama mamaki ganin cewa albashin Osimhen na mako-mako ya zarce wannan adadin tun lokacin da ya lashe gasar Serie A.
Kwanan nan ya nuna tarin motocin dake cikin garejinsa wanda ya kunshi Lamborghini biyu, Rolls-Royce, da Mercedes-Benz—wadda watakila ita ce wadda ake magana a kai, zuwa yanzu dai wakilan Osimhen ba su fitar da wata sanarwa a hukumance ba, watakila dan wasan zai nemi warware matsalar da sauri domin ya mayar da hankali wajen taimaka wa kungiyarsa lashe kofin Super Lig na bana.
Discussion about this post