A baya bayan nan, an gudanar da bikin bude jerin shirye-shirye domin murnar kaddamar da shekarar musayar al’adu da cudanyar jama’a ta Sin da Afirka a kasar Mauritius, wato jerin shirye-shiryen murnar bikin bazara da gasar fasahohin AI ta matasa, mai taken “Zumuncin Sin da Afirka”, domin inganta cudanyar jama’ar Sin da Afirka da samun makoma mai haske.
Fara aiwatar da wadannan shirye-shirye jim kadan bayan dawowar ministan harkokin wajen Sin da ya kaddamar da shekarar musayar al’adu ta Sin da Afrika, ya nuna cewa, kasashen Afrika da al’ummarta na maraba da wannan shiri kuma suna dokin cudanya da fahimtar juna tsakaninsu da kasar Sin.
Kamar yadda shugaban kasar Sin ke cewa, matasa su ne makomar dangantakar kasa da kasa. Mayar da hankali da Sin take yi sosai kan matasan Afrika, abu ne mai muhimmanci domin su ne masu raya dangantakar bangarorin biyu a nan gaba, kuma su ne za su ja ragamar kafawa da tafiyar da al’ummar Sin da Afrika mai makoma ta bai daya.
Yayin da duniya ke karkata ga kirkirarriyar basira, da kasancewar kasar Sin jagora a wannan bangare, gasar kirkirariyar basira tsakanin matasa a Afrika wata gagarumar gudunmawa ce ga bunkasa kwarewarsu, wadda za ta kara musu ilimi da basira da hikima. Sannan wata dama ce ga kasashensu na amfana da fasahar matasan wajen bunkasa harkokin da suka shafi raya tattalin arziki da zamantakewar al’umma.
Bisa la’akari da yawan al’umma a nahiyar Afrika, aikin yi wani babban kalubale ne ga matasan nahiyar, don haka irin wannan gasa za ta kara bude kwakwalwarsu, ta ba su damar zurfin tunani da yin kirkire-kirkire masu amfani da za su ba su damar dogaro da kansu har ma da taimakawa sauran matasa.
Hakika ta hanyar dimbin shirye-shiryenta masu fa’ida, kasar Sin tana ci gaba da bude idon matasan Afrika, tana wayar musu da kai, kana tana ba su damarmakin raino da raya fasahohinsu, har ma da fito da kwarewa da basirar da suke da su.
Ta irin wadannan kyawawan manufofi, za mu gane cewa, ba karfafa mu’amala tsakaninta da nahiyar Afrika kadai Sin ke yi, har da kirkiro wa kasashen Afrika wata hanya ta samu ci gaba irin na zamani mai dorewa, tare da ba su damar shiga takara a duniya.
