Babbar kotun tarayya da ke Abuja ta bayar da umarnin tsare mai fafutuka kuma tsohon ɗan takarar shugaban ƙasa, Omoyele Sowore, a gidan gyaran hali na Kuje (Kuje Correctional Centre). Alƙalin kotun ya yanke wannan shawarar ne jim kaɗan bayan Sowore ya bayyana a gaban kotun sakamakon umarnin kamo shi da aka bayar a baya.
A zaman kotun na yau, lauyoyin gwamnati sun buƙaci da a tsare wanda ake tuhumar domin tabbatar da cewa ya hallarci zaman shari’ar na gaba, musamman bayan rashin bayyana da ya yi a baya. Shari’ar dai tana gudana ne kan zargin da ake masa na tayar da tarzoma da shirya zanga-zangar da gwamnati ke kallo a matsayin barazana ga tsaron ƙasa.
Duk da ƙoƙarin da lauyoyin Sowore suka yi na neman kotun ta ba shi beli ko kuma ta janye umarnin tsare shi tun da ya hallara da kansa, alƙalin ya ƙi amincewa da hakan.
Kotun ta bayyana cewa tsare shin ya zama wajibi har sai an kammala duba hujjoji da kuma shari’ar da aka ɗage zuwa wani lokaci na gaba.
Jami’an tsaro sun yi awon gaba da Sowore zuwa gidan yarin na Kuje ƙarƙashin tsauraran matakan tsaro. Magoya bayansa da ƙungiyoyin kare haƙƙin bil’adama da suka hallara sun bayyana rashin jin daɗinsu da wannan mataki, inda suka bayyana cewa ci gaba da tsare shi tauye haƙƙin faɗin albarkacin baki ne.
