Kotun Ɗaukaka Ƙara da ke zama a Abuja ta ba da umarnin dakatar da Hukumar Zaɓe Mai Zaman Kanta ta Ƙasa (INEC) daga amincewa ko yin aiki da dukan sakamakon tarukan zaɓen shugabanni (congresses) na matakin gunduma, da ƙaramar hukuma, da na jiha da ɓangaren jam’iyyar ADC ƙarƙashin jagorancin Kingsley Mark ya gudanar.
Wannan babban hukunci ya fito ne daga rukunin alƙalai uku na kotun ƙarƙashin jagorancin Mai Shari’a aminiya, biyo bayan ɗaukaka ƙaran da babban jigo a jam’iyyar kuma tsohon ɗan takarar shugaban ƙasa na ADC, Dumebi Kachikwu, tare da wasu mambobi suka shigar. Masu ƙarar sun ƙalubalanci matakin tsohon Shugaban Jam’iyyar na Ƙasa, Chief Ralph Okey Nwosu, da abokansa na ci gaba da gudanar da waɗannan tarukan zaɓe duk da cewa wa’adin mulkinsu na shari’a ya riga ya cika tun a watan Agusta na shekarar 2022.
A cikin hujjojin da Dumebi Kachikwu da lauyansa suka gabatar, sun jaddada cewa tarukan zaɓen da ɓangaren Kingsley Mark da Okey Nwosu suka shirya sun saɓa wa sashi na 223 na Kundin Tsarin Mulkin Nijeriya da kuma ƙa’idojin gudanar da jam’iyyar ADC kanta. Kotun ta amince da cewa barin INEC ta amince da waɗannan taruka zai haifar da babban cikas da rashin adalci ga mambobin jam’iyyar na gaskiya waɗanda ke bin doka.
Wannan dakatarwa ta kotu tana sake ruruta wutar rikicin cikin gida da ta daɗe tana ɗaiɗaita jam’iyyar ADC, wadda ta kasance ɗaya daga cikin manyan jam’iyyun hamayya na gaba-gaba a ƙasar nan. Kotun Ɗaukaka Ƙarar ta umarci dukan ɓangarorin da su dakata da kowane irin taro ko ayyana shugabanni har sai lokacin da ta saurari ainihin ƙashin bayan shari’ar baki ɗaya domin yanke hukunci na ƙarshe.
