Babban Kotun Tarayya da ke birnin Abuja, ƙarƙashin jagorancin Mai Shari’a Joyce Abdulmalik, ta yi watsi da ƙarar da tsohon Gwamnan Jihar Kaduna, Malam Nasir El-Rufai, ya shigar da nufin hana hukumomin yaƙi da cin hanci da rashawa kulle asusun bankunansa a ranar Alhamis, 8 ga watan Oktoba, 2026.
El-Rufai ya shigar da ƙarar ne a gaban kotun yana neman a ba da umarnin hana Hukumar EFCC da ICPC, da DSS, da kuma Atoni-Janar na Ƙasa (AGF) neman izini ko aiwatar da duk wani umarni na kulle asusunsa ko ƙwace kadarorinsa.
A cikin takardun ƙarar, El-Rufai ya buƙaci kotun ta ba da kariya ga asusun bankunansa daban-daban, waɗanda suka haɗa da:
- Asusun Naira a Bankin Zenith (Zenith Bank Plc: 1007158671)
- Asusun Kuɗaɗen Ƙasashen Waje a Bankin Zenith (Zenith Bank Plc Domiciliary: 5071511327)
- Asusun Bankin Guaranty Trust (GTB Plc: 0023824978)
- Asusun Dala a Bankin Access (Access Bank Dollar Account: 1396386493)
- Asusun Naira a Bankin Access (Access Bank Naira Account: 1396382103)
Tsohon gwamnan ya kafa hujja da sashi na 36(5) na Kundin Tsarin Mulkin Nijeriya na shekarar 1999 (kamar yadda aka yi wa kwaskwarima) da sashi na 17(1) na Dokar Yaƙi da Zamba ta 2006, yana mai jayayyar cewa a matsayinsa na ɗan ƙasa yana da haƙƙin a ɗauke shi marar laifi har sai an tabbatar, kuma kulle asusunsa ba tare da kwararan hujjoji ba zai tauye masa haƙƙin samun shari’a mai adalci.
Sai dai a nasu ɓangaren, hukumomin da ake ƙara sun ƙalubalanci shari’ar. Hukumar ICPC ta nuna cewa El-Rufai ya shigar da makamantan waɗannan ƙararraki a gaban Babban Kotun Tarayya da kuma Babban Kotun Birnin Tarayya (FCT High Court), lamarin da zai iya haifar da karo a hukuncin kotuna masu matsayi ɗaya.
A madadin Atoni-Janar na Ƙasa (AGF), Daraktar Ƙararrakin Farar Hula da Dokokin Gwamnati, Maimuna Lami-Shiru, ta bayyana cewa buƙatun El-Rufai zato ne kawai, kuma hukumomin bincike suna da cikakken ikon doka na neman umarni domin gudanar da bincike.
A hukuncin da ta yanke, Mai Shari’a Joyce Abdulmalik ta amince da hujjojin waɗanda ake ƙara, inda ta bayyana cewa ƙarar da El-Rufai ya shigar ta zama cin zarafin tsarin tafiyar da shari’a (abuse of court process).
Alƙaliyar ta jaddada cewa doka ba ta ba da damar a yi amfani da kotu wajen hana hukumomin tsaro da na tabbatar da doka gudanar da ayyukansu da doka ta tanadar musu ba.
