Hukumar da ke kula da madatsar ruwa ta Hadejia Jama’are (HJRBDA), ta shaida wa manoma da kuma kungiyar masu yin amfani da ruwan madatsar ta WUA cewa; kudaden da take caza daga wurinsu, ba matsayin haraji ba ne.
Manoman da kuma kungiyar, na yin amfani da ruwan a shirin aikin noman rani na KRIP da ke Kogin na Kano, wanda ofisnta yake a Karamar Hukumar Kura da ke fadin jihar.
- An Kaddamar Da Bikin Gabatar Da Jerin Shirye-shiryen Telebijin Da Fina-finai Na CMG A Birnin Astana
- Gwamnatin Tarayya Ta Himmatu Wajen Inganta Karfin Sashen Fetur Da Gas Na Cikin Gida
A cewar mahukuntan hukumar, ana karbar kudaden ne, domin gudanar da wasu ayyuka na musamman, domin hukumar ta samu damar gudanar da wasu ayyukanta da kuma kara inganta kayan aiki, na noman ranin.
Shugaban hukumar na HJRBDA, Rabiu Suleiman Bichi, ya bayyana haka ne a lokacin da ya kai ziyarar rangadi a wasu Dam-dam da ke aiki da wutar lantarki, wadanda kuma suke a karkashin kulawar hukumar.
Rabiu ya bayyana cewa, hukumar ta mayar da hankali wajen ganin tana kara bunkasa ayyukanta tare kuma da ci gaba da kula da sauran manyan kayan gudanar da ayyukanta da kuma ci gaba da taimaka wa manoman, domin su samar da wadataccen abinci da kara habaka tattalin arzikin da ke yankin.
Ya kuma bukaci da a ci gaba da hada hannu da masu ruwa da tsaki a fannin, musamman domin dakile kalubalen da ake fuskanta na rashin amfana da albarkatun da ke madatsar ruwan, musamman domin kara bunkasa fannin aikin noma da kuma kara samar da wadataccen abinci.
A nasu martanin daban-daban, wasu daga cikin manoman sun yi kira ga hukumar ta HJRBDA, da ta samar musu da Taraktocin noma a daminar bana da kuma lokacin noman rani.
Tawagar ta hukumar HJRBDA, ta ziyarci wuraren adana ruwa; ciki har da na Challawa, Dam din Gorge, wanda ke adana ruwa mai karfin tsawon zurfin mita miliyan 962 da Dam din Tiga, wanda ke iya adana ruwan da zurfinsa ya kai kimanin mita biliyan 1.968 da madatsar ruwan ta Ruwan Kanya da ke iya adana ruwan da ya kai zurfin mita miliyan 50.
