Kwamitin wucin-gadi na Majalisar Wakilai da ke binciken ayyukan wata kungiya da ake kira Presidential Foreign Investment Promotion Council (PFIPC), ya bayyana cewa ba a taba kafa kungiyar bisa doka ba, yana mai bayyana ta a matsayin wata hukumar gwamnati ta bogi.
Kwamitin ya kuma ce takardar da ake ikirarin cewa an nada Adeyemi Adeniyi a matsayin Darakta-Janar na PFIPC takardar bogi ce, kamar yadda sakamakon binciken farko da kwamitin ya fitar ranar Laraba ya nuna.
Shugaban kwamitin, Hon. Ibrahim Sani Madaki, ya bayyana cewa binciken da suke gudanarwa ya zuwa yanzu ya wanke tsohon Shugaban Ma’aikatan Fadar Shugaban Kasa, Femi Gbajabiamila, daga duk wata alaka da ayyukan hukumar da ake zargin.
Madaki ya yabawa Gbajabiamila bisa sanar da hukumomin da abin ya shafa game da samarwa da ayyukan hukumar, yana mai cewa matakin nasa ya taimaka wajen tona asirin wata babbar hanyar kafa hukumomi na bogi da ke fakewa da sunan hukumomin gwamnati.
A cewar kwamitin, masu bincike sun gano wasu cibiyoyi 12 da ake zargin suna gudanar da ayyukansu ba bisa ka’ida ba, suna fakewa da cewa hukumomin gwamnati ne.
’Yan majalisar sun kuma bayyana cewa an gano asusun banki 58 da ke da alaka da Adeyemi Adeniyi dangane da hukumomin da ake bincike a kansu.
Daga cikin cibiyoyin aka gano akwai FCT Investment Promotion Council, FCT Investment Promotion Agency and Public-Private Partnership, United Nations Youth Global Foundation, da Olubadan of Ibadan Foundation.
Kwamitin ya ce wannan bincike ya haifar da matukar damuwa kan ayyukan wasu mutane da cibiyoyi da ake zargin suna gabatar da kansu a matsayin halastattun hukumomin gwamnati, alhali kuwa suna gudanar da ayyukan da ba su da izinin yin su.
Ya kara da cewa binciken yana ci gaba da gudana, kuma za a gabatar da wasu shawarwari bayan kammala binciken da ake yi kan PFIPC da sauran cibiyoyin da aka gano.
