Ga dukkan alamu al’amuran siyasa da na shugabanci a duniya suna daukar wani sabon salo, musamman kan lamuran duniya.
Kowa dai ya san da cewa Amerika ta dade tana yin kaka gida a cikin harkokin duniya, musamman a fannin siyasa da tattalin arziki, wato sai abin da take so za a yi, domin ita ce ke juya akalar tattalin arzikin duniya, ta sanya takunkumin karya tattalin arziki ga duk kasar da ta bijirewa manufofinta, ko kuma ta tumbuke shugaban kasar da ya ki amincewa ya zama dan amshin shatan Amerika, ya Allah ko kai tsaye ko kuma irin abin da ya faru da shugaban kasar Venezuela.
Hakika zalunci ba ya dorewa, domin kuwa alamu suna bayyana cewa, wannan shugabanci na kama karya da Amerika ke aiwatarwa, ya fara samun koma baya. Kasashen duniya sun fara dawowa daga rakiyar shugabanci irin na zalunci.
Hatta kawaye da ’yan koren Amerika sun fara juyawa Amerika baya a kan manufofinta na rashin adalci. Kamar kungiyar NATO ta ki amincewa ta shiga cikin yakin da Amurka da Isra’ila ke yi da kasar Iran, shi ma firaministan Burtaniya ya fito karara ya ce Burtaniya ba za ta shiga cikin wannan yaki na rashin hankali ba.Yanzu haka dai kasar Sin ta zarce Amerika ta fannin samun goyon baya na jagoranci a duniya. Wannan ya bayyana ne a samakon wata kuri’ar jin ra’ayin jama’a da aka gudanar a shekara ta 2025, inda Sin ta samu kashi 36, yayin da Amerika ta samu kashi 31.
Da ma dai kasar ta Sin ta taba zarce Amerika a irin wannan kuri’ar jin ra’ayin jama’a kan shugabanci har sau biyu, wato lokacin gwamnatin Geoge W. Bush da kuma lokacin shugabancin Donald Trump a karo na farko.
Manyan abubuwan da suka haifar da wannan sauyi sun hada da yadda Sin take maida hankali kan sakamako mai kawo ci gaba a kasashe musamman masu tasowa. Akwai kuma batun hadin gwiwa tsakanin Sin da sauran kasashe wanda aka gina kan tubalin cude ni in cude ka.
Sannan sai batun sabunta manufar nan ta mutuntawa da kiyaye cikakken ’yancin kasa ba tare da la’akari da girma ko kankanta ba, ko kuma karfi ko rauni ba.
Wadannan batutuwa sun taimaka wajen baiwa Sin damar yin zarra da kwarjini a tsakanin kasashen duniya. Yayin da a waje daya ita kuma Amerika take ta fuskantar kalubale kan manufofinta na rashin adalci, zalunci da kuma rashin sanin ya kamata.Wani muhimmin abin da ya kara zubar da mutuncin Amerika shi ne yadda kasar ta fice daga kungiyoyi na kasa da kasa kimanin 66, wadanda suke ba da gudummuwa ta fannoni daban daban ga bil adam. Janye tallafin da Amerika ke baiwa irin wadannan kungiyoyi na kasa da kasa ya haifar da mummunan tasiri musamman ga kasashe masu tasowa.
A waje daya kuwa, sabanin hakan, kasar Sin ta kara bunkasa manufarta ta hadin gwiwa domin amfanin kowa da kowa.
Kasashe da dama suna amfana da Sin a fannoni daban daban, kamar tashoshin jiragen ruwa, filayen saukar jiragen sama, titunan mota, layukan dogo da sauransu. Kasashe da dama daga nahiyar Afirka, Asiya da Latin Amerika sun amfana da irin wannan manufa ta kasar Sin.
Kuma abin ban sha’awa a nan shi ne kasar Sin ba ta shimfida wasu sharudda ga kasa kafin samar da irin wadannan ababen more jin dadin rayuwa. Sannan kuma ta tsaya kan manufar nan ta kaucewa tsoma baki cikin harkokin cikin gida na kasashe. (Lawal Mamuda)
