Shugaban Hukumar Ƙwallon Ƙafa ta Duniya (FIFA), Gianni Infantino, ya ce FIFA ta yi iya ƙoƙarinta wajen tabbatar da cewa Iran ta halarci Gasar Kofin Duniya ta 2026 cikin kwanciyar hankali, duk da takun-saƙar siyasa da ke tsakaninta da Amurka.
A saƙon da ya wallafa a Instagram, Infantino ya ce masu sukar FIFA su mayar da hankali kan jin daɗin wasan ƙwallon ƙafa maimakon yaɗa jita-jita. Ya ƙara da cewa gasar ta kawo haɗin kai, zaman lafiya da farin ciki ga miliyoyin mutane.
Sai dai kocin Iran, Amir Ghalenoei, ya ce tawagarsa ce ta fi fuskantar ƙalubale a gasar.
Ya bayyana cewa an jinkirta ba wa wasu ‘yan tawagar biza, an hana wasu shiga Amurka, sannan aka sauya musu wurin atisaye daga Arizona zuwa Mexico, lamarin da ya jefa su cikin wahala.
Ba Iran kaɗai ta fuskanci matsalar ba, domin wasu magoya bayan Haiti, Senegal da Ivory Coast su ma sun gamu da matsalolin tafiye-tafiye saboda dokokin gwamnatin Amurka.
A halin yanzu, FIFA na ci gaba da bincike kan wasu rikice-rikice da suka faru a wasu wasannin gasar, ciki har da matsalolin tsaro da kuma yadda aka gudanar da wasu alƙalanci.
Infantino ya ce duk da waɗannan ƙalubale, gasar ta yi nasara, sannan ya buƙaci masu sukar FIFA su daina yaɗa jita-jita su mai da hankali kan ƙwallon ƙafa.
