Shugaban kungiyar masu sarrafa takin zamani da rabar da shi na kasa (FEPSAN), Injiya Olusegun Falade ya bayyana cewa; kungiyar na kan koarin ganin an rage tsadar farashinsa.
Ya sanar da haka ne a Jihar Kaduna, a taron wayar da kai na tababatar da sahihancin takin zamanin na samarin NPK da cibiyar kasa da bunkasa samar da takin zamni (IFDC), ta dauki nauyi na 2025.
- Farashin Kayan Abinci Na Cigaba Da Sauka A Jihohin Arewa Maso Gabas
- Matatar Dangote Ta Rage Farashin Man Fetur Zuwa Naira 699
“Na kasance daga cikin wadanda suke kan gaba wajen ganin shirin ya dore, hakan zai bayar da dama domin ganin kowa ya samu alkaluman da ake bukata a bangaren samar da bayanai, musamman a fannin masana’antar sarrafa takin zamani,” a cewar shugaban.
Ya kara da cewa, ba wai taki ba ne kadai farashinsa ya tashi, hatta kusan komai farashinsa ya karu a Nijeriya, musamman a cikin shekaru biyu da suka gabata.
Shugaban ya ci gaba da cewa, manyan dalilai biyu ne kusan suka sanya farashin ya tashi a kasar nan, musamman sabbin sauye-sauyen da gwamnatin tarayya ta kirkiro da kuma rashin samun tabbacin farashin kaya a kasuwannin kasar, wanda hakan ya jawo mutane suke daukar matakan da ba su dace ba.
Ya yi nuni da cewa, sakamakon yakin da ake ci gaba da gabzawa a tsakanin Kasahen Russia da Ukraine, tun a 2022, hakan ya haifar da tashin farashinsa a daukacin fadin duniya.
Shugaban ya kara da cewa, hatta farashin sinadarin hada takin na MOP, wato Potash ya tashi, haka farashin sinadarin DAP, wato Diammonium Phosphate shi ma ya tashin zuwa sama da dala 900 kan tan ko sama da dala 1,000, a wasu lokutan, inda a yanzu ya kai dala 700 kowane tan daya.
Ya sanar da cewa, idan mutane sun koka kan tashin farashinsa, mu ma muna jaddada musu cewa, mun saye shi da tsada, wanda kuma idan farashin dala ya tashi a duniya, hakan na shafar farashin naira.
Sai dai, ya bayyana cewa; kungiyar na ci gaba da gudanar da rabon takin, ba tare da an kara masa wani farashi mai tsada ba, inda yayi nuni da cewa, ba don samar da wannan dauki ba, da yanzu farashinsa ya karu.
A cewarsa, mun tattauna da kwamitin da ke samar da daidaiton farashinsa tare da hadaka da hukumar zuba jari ta kasa (NSIA) da kuma taimakawar sashen kudi MOFI, na ma’aikatar kudi ta tarayya, wadanda ya sanar da cewa; suna kan kokarinsu wajen ganin an samar da sauki kan farashinsa.
Ko da yake, ba a lokaci guda za a wanzar da hakan ba, amma muna sa ran a 2026, farashin zai ragu.
Ya kara da cewa, ana kuma ci gaba da samun raguwar farashin kayan da ake hada takin zamanin da su.
Ya ci gada cewa, gwamnatin tarayya na ci gaba da kokarin daidaita farashin kayan da ake sarrafa takin zamani, wanda hakan zai bayar da damar gudanar da gasa a kasuwar da ake sayar da shi, wanda kuma har yanzu, ana ci gaba da yin wannan tsari.
Ya sanar da cewa, har zuwa yanzu, muna ci gaba da tabbatar da cewa; farashin nasa ya ragu.
Kan batun baragurbin da ke gurbata takin, shugaban ya sanar da cewa; kasancewarmu a kan gaba wajen sarrafa takin a kasar nan, gurbata takin na daga cikin matsalar da ke shafar mu.
A cewarsa, irin wadannan bata gari na kwaikwayar buhunhunan da muke zuba taki tare da sayar wa jama’a.
“Idan mun gano, muna kama irin wadannan bata gari ko kuma mu kore su daga kasuwar, a yanzu muna yin amfani da kimiyyar fasahar zamani wajen yakar masu gurbata takin, in ji shugaban.
