Sanatan Bauchi ta Kudu, Shehu Buba Umar, ya ce a shirye yake ya fuskanci cikakken bincike daga hukumomin tsaro kan zarge-zargen da ake yi masa na alaƙa da ’yan bindiga, ko ɗaukar nauyin ta’addanci ko garkuwa da mutane. Buba ya ce shi da kansa ya miƙa kansa ga Hukumar Tsaro ta Farin Kaya (DSS) domin gudanar da bincike kan zarge-zargen.
Da yake magana da ’yan jarida a Bauchi ranar Litinin, Sanatan ya ce “babu abin da nake ɓoyewa, kuma babu wani abin da nake fargabar a bankaɗo a kaina.” Ya ce ya musanta zarge-zargen gaba ɗaya, yana mai cewa bai taɓa ɗaukar nauyin ’yan bindiga ko tallafa musu da kuɗi, ko makamai ko wata hanya ba. Ya ce zarge-zargen sun fara ne tun shekarar 2024 a matsayin yarfen siyasa, kafin su sake bayyana ta wasu hanyoyi.
Buba ya ce tawagar lauyoyinsa ƙarƙashin jagorancin tsohon Shugaban Ƙungiyar Lauyoyin Nijeriya (NBA), Yakubu Chonoko Maikyau, SAN, ta rubuta wa DSS, da Hukumar Leƙen Asirin Tsaro ta Sojoji (DIA) da Rundunar ’Yandandan, inda ta nemi a gudanar da bincike kan zarge-zargen. Ya kuma ƙalubalanci duk wanda ke da hujjar alaƙarsa da ’yan bindiga, ta’addanci ko garkuwa da mutane da ya miƙa ta ga hukumomin tsaro maimakon ya yaɗa zarge-zargen a kafafen sada zumunta.
Sanatan ya ce ya amince a gurfanar da shi a gaban kotu kuma a hukunta shi idan bincike ya tabbatar da cewa yana da hannu a ayyukan laifin da ake zarginsa da su. Ya kuma ce hukumomin tsaro su gayyaci mutanen da ke yaɗa zarge-zargen domin su gabatar da hujjojin da suke da su. Buba ya ƙara da cewa ya taɓa jagorantar Kwamitin Majalisar Dattawa kan Tsaron Ƙasa da Leƙen Asiri, inda ya yi aiki tare da sojoji da hukumomin leƙen asiri wajen yaƙi da ’yan bindiga, ta’addanci da garkuwa da mutane.
Buba ya ce lauyoyinsa sun kuma gano wani mai suna Hassan Saleh Hussaini, wanda yake zargin yana da hannu wajen yaɗa wasu daga cikin zarge-zargen daga Jamhuriyar Nijar. Ya ce an kai rahoton lamarin domin neman taimakon Interpol, yayin da aka ɗauki lauyoyi a Nijar domin bin hanyoyin shari’a.
Sanatan, wanda shi ne ɗan takarar gwamnan Jihar Bauchi na jam’iyyar PRP a 2027, ya ce yana ganin wasu na amfani da zarge-zargen ne a matsayin yarfen siyasa domin rage masa damar samun nasara a zaɓen gwamna na 2027.
