Abotaka a tsakanin ‘yan Adam, wata abace, da ake fatan ci gaba da yi a tsakanin abokai, har iya tsawon rayuwarsu.
Wannan batun ya taso ne, in aka yi la’akari da cewa, a wasu lokutan, musamman ma a masana’antar Kannywood a kan samu sabani, a tsakanin, jarumi ko jaruma musamman ma wadanda suka yi matukar shahara, a masana’antar da wani abin kan bijero, ya shiga tsakaninsu, har abotakarsu ta samu matsala.
An kwashe shekaru ma su yawa, irin wadannan jaruman abotakarsu da ta kai matakin makura har ma tamkar sun zama ‘yan uwan juna ne, ana ganin, babu abin da zai iya haddasa wani sabanin abotakarsu.
Kazalika ma, irin wannan abotakar, ta kan kai ga matakin daya na iya kare mutunci da kimar dayan, a duk wata irin sarkakiyar da daya ya samun kansa a ciki, inda a wasu lokutan, jarumi ko jaruma, kan gina sana’a tare.
Sai dai kuma duk da hakan, idan mai aukuwa ta auku, jaruman su kan shiga ‘yar tsama da juna, wanda hakan, ke kawo sabanin abotakar ta su.
A wasu lokutan ma, rashin jituwar, kan kasance a asirce ne, wasu lokutan kuma ta kai ga har ta bayyana, a sarari ana gani.
Dangantaka a tsakaninsu, na kasancewa ne, ta hanyar yin biyayya, fahimtar juna da kuma taimakawa juna, musamman a yayin da daya daga cikinsu, ya shiga cikin wata chakwakiya.
Amma idan wani sabani, ya shiga tsakaninsu, inda har ta kai su ga, yin baran-baran da juna.
Takun sakar a tsakanin, har ta kai ga, miliyoyin masoyansu kan tofa na su albarkacin bakin, musamman ma maganar zarge-zarge, wadanda hakan ke kara yin tasiri ga kara abotakar jaruman da hakan ta faru da su.
Rahotannin sun nuna cewa, a shekarun da suka wuce, batun lalacewar abotaka a tsakanin wasu jarumai, maza da mata a masana’antar, ta zamo abin tattaunawa, a tsakanin masu bibiyar masana’antar.
Bugu da kari kuma, tattaunawar ta fi yin kamari, a shafukan sada zumunta na zamani. Wasu daga cikin masoya bayan jaruman, su kan yi mamaki, kan lalacewar abotar, idan aka yi la’akari da cewa, a baya, za a ga jarumi ko jaruma, sun kasance, abokai na kut-da kut, tare da yi wa junansu, biyayya.
A nan, za mu yi nazari kan wasu daga cikin jarumai da juruma a Kannywood, da suka tsinci kansu, a cikin wannan maudu’in
Ali Nuhu Da Adam A. Zango:
Fitattun jaruman Ali Nuhu da Adam A. Zango na daya daga cikin irin abotakar da ake zargin ai ta samu sabani.
Jaruman biyu, tun farkon tasowarsu, a Kannywood, aminan juna ne, wanda hakan, ya kara sanyawa, suka yi matukar tashe, a masana’antar.
Sai dai, an yi zargin cewa, abotarsu ta fara yin baya ne a 2019, inda hakan har ta kai ga, masoyansu, suka fara ganewar hakan.
Duk da kokarin da wasu masoyansu suka yi, na sulhunta su, an yi zargin cewa, har yanzu suna ci gaba da zaman Doya da Manja.
Momee Gombe Da mawaki Hamisu Breaker:
Su ma ana zargin, suna a cikin irin waccan da’irar , jaruma Momee Gombe da mawaki Hamisu Breaker, sun shafe shekaru, a matsayin abokan juna.
A lokacin suna danyen Ganye, an sha ganinsu, a cikin faifan bidiyo suna rera waka tare kuma su kan halarci taruka tare.
Masu bibiyarsu, sun sha famar yin tsegumi, cewar, abotaka a tsakaninsu, ta fara yin tsami.
A baya, saboda irin abotakarsu, har ana yi masu kallon masoya ne, sai dai kuma, sun sha karyata hakan.
Sai dai, kuma ana ganinsu a taruka a shekarun baya, amma irin hakan ya ragu, ba kamar yadda, aka saba ganinsu ba a shekarun baya.
Abubakar Bashir Maishadda Da Alhaji Sheshe:
Wadannan fitattun jaruman, shakikan abokai ne, a sheakarun baya, sai dai, ana zargin abotarsu, ta fara samun nakasu.
A baya, sun yi aiki a tare a fina-finan da suka hada da kamar irin na Ana Dara Ga Dare da Mariya.
An yi ta rade-radin cewa, abotakarsu ta fara raguwa ne, bayan Maishadda, ya bude wata sabuwar kasuwar da ake zargin cewa, Sheshe ya kauracewa, inda hakan ya fara jefa shakku, a zukatan masoyansu.
Sai dai kuma, daga baya, sun sake haduwa a wasu wuraren daukar fim da kuma a wasu taruka, wanda hakan ya nuna cewa, tamkar, an samu damar sasanta su ne.
Domin a fahimci yadda ake samun lalacewar abotaka a masana’antar a tsakanin wasu jaruman ko jaruma, mai fashin baki a masana’antar Sharif Yusuf, yayi karin haske kan lamarin, sai dai, ya yi nuni da cewa, batun ya danganta ta yadda aka faro shi.
“Samun sabani wani abu ne, da za a iya warwarewa, a cikin ruwan sanyi, amma a Kannywood, masana’anta ce, da al’ummar gari, musamman masoya, ke bibiya sau da kafa, “ inji Yusuf.
Ya ce, ba wani sabon abu ba ne, a lura da samun sabani a tsakanin jarumi da jaruma, a Kannywood ba, inda ya kara da cewa, masu kafafen sada zumunta na zamani su ma suna kara ruruta wutar hakan, idan wata rashin fahimta, ta auku a tsakanin jarumi da jaruma.
“Abotaka a tsakanin jarumi da jaruma, na samo asali ne, ta hanyar yin hadaka ko kuma gudanar da aiki, tare, “cewar Sharif.
“Masana’antar Kannywood, cike take da gasa da ban da ban, inda za ka ga, abokai, a masana’antar, musamman ma wadanda suka shaku da juna, na neman wata dama, da tayi kama, ko neman wata bukatar karramawa da wata lambar yabo ko sahalewar wata dama wanda hakan ke janyo, samun sabanin abotaka a tsakanin jarumi ko jaruma,” a cewarsa.
A cewarsa, koda kuwa akwai kyakkyawar fahimtar abotaka a tsanin jarumi ko jaruma, matsala na iya kunno kai a tsakaninsu.”
Ya ce, gasa a tsakanin jaruman na kara taka gagarumar gudunmawa, wajen samun sabani a tsakaninsu, inda ya kara da cewa, samun kudade, neman kwangila, suma na taimaka wa.
Ga masoyansu, idan hakan ta auku, su kan nuna rashin jin dadinsu, musamman ma idan rashin jituwar, ta zamo ta hakika.
Akasari ma, idan har aka samu wata rashin fahimta, musamman a tsakanin jarumi ko jaruma da suka yi shura a masana’antar Kannywood, duniya na nan a gefe, ta sanya ido, tana kallo.
