Gwamnatin Tarayyar Nijeriya da wani kamfanin ƙasar China mai suna New Power Technology (NPT) sun ƙulla wata muhimmiyar haɗin gwiwa domin farawa ƙera da haɗa kayan aikin motocin CNG da motocin lantarki (EƁ) a cikin Nijeriya.
Gwamnatin ta ce haɗin gwiwar, wanda gwamnatin China ke mara wa baya gaba ɗaya, zai mayar da hankali kan ƙira da haɗa injinan cika iskar CNG, tashoshin cika mai da kuma wuraren cajin motocin lantarki a cikin gida, a wani ɓangare na ƙoƙarin Nijeriya na ƙarfafa amfani da kayayyakin cikin gida, rage dogaro da shigo da kaya daga ƙasashen waje da kuma bunƙasa amfani da makamashi mai tsafta wajen sufuri.
Hakan ya fito ne bayan wata ganawa tsakanin tawagar kamfanin NPT ƙarƙashin jagorancin Liu Shihua da Mataimakin Shugaban Ƙasa, Kashim Shettima, a Abuja.
Mataimakin shugaban ƙasar, wanda mataimakin shugaban ma’aikata na shugaban ƙasa, Sanata Ibrahim Hassan Hadejia ya wakilta, ya ce wannan mataki ya yi daidai da umarnin Shugaba Bola Ahmed Tinubu na wajabta amfani da motocin CNG a dukkan hukumomin gwamnati, kuma hakan zai taimaka wajen magance matsalolin sufuri.
Sanata Shettima ya ce shirin horas da ƴan Nijeriya 100,000 aƙalla mutum 1,000 daga kowace jiha tare da ɗaukar nauyin mutum 100 zuwa ƙasar China domin samun horo, wani ɓangare ne na manufar haɗa kowa da kowa cikin tsarin “Renewed Hope Agenda” na shugaban ƙasa.
Ya bayyana cewa duk da cewa Nijeriya tana daga cikin manyan kasuwanni masu tasowa a duniya, inda matsakaicin shekarun jama’a ke kusan 21.4, yanayin kasuwarta ya yi kama da na China a shekarun 1980, wanda hakan ke nuna yiwuwar maimaita nasarar da China ta samu wajen amfani da motocin lantarki.
“Ana iya cimma sauyin sufuri mai tsafta da kare muhalli ta hanyar amfani da sabbin fasahohin muhalli na China. Inganta ƙwarewar cikin gida da horaswa su ne mabuɗin samun nasara da jawo hankalin masu zuba jari,” in ji shi.
Sanata Shettima ya kuma yaba wa gwamnatin China bisa tayin tallafin manufofi da kuɗi domin gina motocin lantarki da wuraren cajinsu. Ya ce ziyarce-ziyarcen da aka kai masana’antun China sun taimaka wajen samun rangwamen farashin motocin lantarki, tashoshin caji da sauran kayan aiki.
Ya yaba wa kamfanin NPT bisa ƙoƙarinsa wajen bunƙasa jarin ɗan’Adam na gwamnatin Tinubu ta hanyar “haɓaka kusan ayyukan injiniyan chips guda 10 cikin shekaru uku, tare da gina masana’antar chips ta lantarki, musamman ta hanyar horas da matasa, mata da masu rauni a al’umma.”
Tun da farko, shugaban tawagar NPT, Liu Shihua, ya shaida wa mataimakin shugaban ƙasar cewa manufarsu ita ce gina cikakken tsarin motocin lantarki, ciki har da sauya motocin man fetur zuwa lantarki, cibiyoyin musayar batir da kuma tsarin kula da ayyuka ta hanyar fasahar zamani.
