Tsohon Ministan Sadarwa da Tattalin Arziƙin Zamani, Farfesa Isa Ali Ibrahim Pantami, ya bai wa Hukumar Zaɓe Mai Zaman Kanta ta Ƙasa (INEC) wa’adin kwanaki uku (3) ta gaggauta wallafa sunansa a cikin jerin sunayen ƴan takarar kujerar gwamnan Jihar Gombe na babban zaɓen 2027.
Wannan gargaɗi ya biyo bayan rashin sanya sunansa a cikin jerin sunayen ƙarshe na ƴan takara da hukumar ta fitar kwanan nan, lamarin da ya haifar da cece-kuce a tsakanin magoya bayansa. Pantami ya bayyana cewa matakin na INEC ya saɓa wa doka, duba da cewa ya lashe sahihin zaɓen fidda gwani na jam’iyyarsa wanda jami’an hukumar da kansu suka sanya wa ido suka kuma tabbatar da sahihancinsa.
A cikin wata wasiƙar ƙorafi da lauyoyinsa suka aike wa shalƙwatar INEC a Abuja, sun buƙaci hukumar da ta gaggauta gyara wannan kuskure ta hanyar mayar da sunansa a cikin jerin ƴan takarar ba tare da ɓata lokaci ba kafin cikar wa’adin kwanaki ukun.
Sanarwar ta gargaɗi cewa idan har hukumar ta gaza cika wannan buƙata a cikin wa’adin da aka dibar mata, ba za su yi ƙasa a gwiwa ba wajen garzayawa Babbar Kotun Tarayya domin neman umarnin tilasta wa INEC sanya sunansa, tare da neman biyan diyya kan ƙoƙarin tauye masa haƙƙinsa na tsayawa takara.
Wannan mataki ya ƙara ruruta wutar rikicin siyasa a Jihar Gombe yayin da ake tunkarar zaɓen 2027, a daidai lokacin da INEC ke fuskantar matsin lamba da bore daga ƴan takara da jam’iyyun siyasa daban-daban a faɗin Nijeriya kan batun cire sunayen waɗanda suka lashe zaɓukan fidda gwani a jerin sunayen ƙarshe.
