Kamar yadda aka saba gudanarwa duk shekara a shirye-shiryen watan Azumin Ramadan, a ranar Lahadi 15 ga watan Fabrairu, 2026, Shehu Ismaila Umar Allamaddah (Mai Diwani) ya buɗe karatun Tafsirin Alƙur’ani mai girma, inda Alaramma Malam Ahmadu Yunusa ke jan baki.
Mai Diwani ya buɗe Tafsirin ne a Zawiyar Ahlul Faidhati Mai Diwani Group da ke, Matazu close, Sabon gari, Kagoro express, western by-pass, Kaduna.
- Gwamnatin Tarayya Ta Kai Nasir El-Rufai Kotu Kan Zargin Kutsen Layin Sadarwar Nuhu Ribadu
- FIFA World Cup: Yau Nijeriya Za Ta San Makomarta
Jama’a da dama da suka fito daga cikin garin Kaduna da sauran sassan jihohin Nijeriya ne suka halarci taron wanda ya gudana daga karfe 2:00 na rana zuwa 4:00 na yamma.
Almaddah, ya yi kira ga al’umma da ta ɗauki ɗamarar zurfafa bincike a Ilimi don gano taskoki da ilimai da Alƙur’ani ya tattaro mana, inda ya yi sharhi da cewa, “duk abin da yazo a Alƙur’ani, ilimi ne mai girma ba na wasa ba”.
Har ila yau, ya ci gaba da cewa, “duk abin da ya sauka a Alƙur’ani sai ya tabbata, ko dai a zamanin Annabi SAW ko a bayansa”, saboda ubangiji na cewa, “la tuharrik bihi lisanaka, li ta’ajala bihi, inna alaina jam’ahu wa ƙur’anah.”
Daga karshe, Shehu Mai Diwani ya yi addu’a, Allah ya sa a fara Azumi lafiya, cikin ƙoshin lafiya, da buɗin arziki, sannan Allah ya mayar da kowa gida lafiya.
