Rikicin shugabancin da ya kunno kai a cikin jam’iyyar PDP ya sanya shakku kan ko za a gudanar da babban taron kwamitin zartarwa na jam’iyyar na kasa, wanda aka shirya zai gudana a watan Fabrairun 2025.
Duk da tabbacin da sakataren jam’iyyar na kasa, Sam Anyanwu, ya bayar na cewa taron zai gudana kamar yadda aka tsara, rarrabuwar kawuna a cikin kwamitin gudanarwa na kasa da kalubalen shari’a na ci gaba da kawo cikas.
- Fatara Da Talauci Na Yi Wa ‘Yan Nijeriya Miliyan 13 Barazanar Fadawa Kangin Talauci A 2025 — Rahoto
- Gwamnatin Katsina Ta Fitar Da Naira Miliyan Dubu 50 Domin Samar Da Ruwan Sha
Anyanwu, wanda a halin yanzu Sunday Ude-Okoye ke ikirarin shi ne halartaccen sakataren jam’iyyar PDP na kasa da kotun daukaka kara ta shaidawa.
Babban taron wanda tun farko aka tsara za a gudanar a watan Oktoba na 2024, daga baya kuma aka kai shi zuwa Nuwamba 2024 kafin a dage shi har gaba daya, ana ganin yana da matukar muhimmanci wajen magance muhimman batutuwan da suka shafi jam’iyyar. Wadannan sun hada da duba tsarin shugabanci, warware rikice-rikicen cikin gida, da tsara dabarun zabe mai zuwa.
A tsakiyar rikicin shugabancin akwai shugaban riko na kasa, Umar Damagum, wanda matsayinsa ya haifar da cece-kuce, wanda ake ta kiraye-kirayen ya yi murabus, musamman daga kungiyar gwamnonin PDP na kara ta’azzara lamarin bisa zargin rashin dinke barakar da ke kara kunno kai a cikin jam’iyyar.
An yi kokarin cire Damagum ta hanyoyin siyasa, ciki har da yiwuwar nada sabon shugaba daga yankin arewa ta tsakiya, amma hakan ya ci tura.
Gwagwarmayar bangaranci dai ta kara dagula al’amuran cikin gida na jam’iyyar, inda aka samu bangaren masu biyayya ga fitattun mutane irin su tsohon mataimakin shugaban kasa, Atiku Abubakar da ministan Babban Birnin Tarayya Abuja, Nyesom Wike.
Wadannan rarrabuwar kawuna sun gaza samar da fahimtar juna, wadanda suka zama kalubalen da ya haifar da dakatarwar wasu daga cikin jami’an jam’iyyar.
Yayin da watan Fabrairun 2025 ke gabatowa, masu ruwa da tsaki sun nuna damuwarsu na cewa PDP na fuskantar babban kalubale a gabanta.
