Manyan jam’iyyun adawa a kasar nan sun caccaki tsohon shugaban kasa, Muhammadu Buhari kan yadda ya bukaci ‘yan Nijeriya da su rika rokon Allah ya farfado da Nijeriya maimakon amincewa da cewa gwamnatin da jam’iyyar APC ke jagoranta ta gaza wa talakawa.
Buhari ya fusata da yawan ‘yan Nijeriya a lokacin da ya ja hankalin magoya bayansa cewa ka da su yi kasa a gwiwa a taron masu ruwa da tsaki na jam’iyyar APC a Katsina a ranar Asabar.
- Kafar CMG Ta Samu Nasarar Yayata Shirin Shagalin Murnar Bikin Bazara A Kasashen Waje
- Gwamna Nasir Ya Ƙaddamar da Aikin Titin Koko–Zuru Kan Naira Biliyan 64
A cewarsa, ‘Allah ne kadai zai iya magance matsalolin Nijeriya.’
Tuni dai kalaman nasa ya janyo cece-kuce a tsakanin ‘yan Nijeriya a shafukan sada zumunta daban-daban.
Da yake mayar da martani, sakataren yada labarai na jam’iyyar NNPP, Ladipo Johnson, ya bayyana cewa kalaman Buhari na nuni ne da cewa gwamnatin APC na yaudarar jama’a duk da sanin cewa ba ta da masaniya kan matsalolin da kasar ke fuskanta.
Jam’iyyar PDP ta yi irin wannan martani. Mataimakin shugaban matasan jam’iyyar PDP na kasa, Timothy Osadolor, ya ce furucin na Buhari ya nuna gazawar gwamnatin Shugaba Bola Tinubu.
Haka zalika, shugaban matasan jam’iyyar LP na kasa, Prince Kennedy Ahanotu, ya ce bai yi mamakin jawabin tsohon shugaban kasar ba, domin yana daya daga cikin ‘yan Nijeriyar da suka kasa daukaka kasar.
Ahanotu ya kara da cewa, lokaci ya yi da ‘yan Nijeriya za su bai wa matasa damar gyara matsalolin da suka faru a baya.
Ya ce, “Gaskiya ni ba masoyin Buhari ba ne kuma ban taba tsammanin zai yi abin kirki ba. Don haka ban yi mamakin cewa bai yi komai tsawon shekaru takwas ba. Amma abin da nake nufi shi ne, muna cikin kasar da kafin sabon shugaban kasa ya hau kan karagar mulki ana tunanin zai yi garambawul. Abin takaici, idan har ya hau mulki ba ya iya aiwatar da komi.
“Kalamun Buhari ba shi da ma’ana a gare ni. Ba wani abu ba ne ma na so in yi magana a kansa saboda tsarin su ne. Kar ku manta wannan shugaban kasa na yanzu yana cikin wadanda suka yi zanga-zanga kuma suka yi yaki a NADECO domin gwamnati ta yi abin da ya dace. Amma a yau, sun kasa tsare ‘yan Nijeriya.”
