A yau Litinin ne kakakin ma’aikatar harkokin wajen kasar Sin Guo Jiakun, ya ce Sin na da burin ganin al’ummunta da na Amurka daga dukkanin sassa, sun ingiza ruhin diflomasiyar kwallon tebur.
Guo, ya bayyana hakan ne yayin taron manema labarai na yau da kullum, yana mai cewa shekaru 55 da suka gabata, “Diflomasiyar kwallon tebur” ta rushe shingaye, tare da bude kofar musaya tsakanin Sin da Amurka, kuma ta haifar da dama ta ingiza fahimtar juna tsakanin al’ummun kasashen biyu.
Guo ya kara da cewa, bayan shekaru 55, an ci gaba da wanzar da ruhin diflomasiyar kwallon tebur daga zuriya zuwa zuriya, ana ta fadada ta daga kwallon tebur zuwa sauran wasanni, irinsu kwallon kwando, da rugby, har ma zuwa sauran fannoni daban daban. Ya ce dukkanin wadannan sun shaida burika, da imanin matasan kasashen biyu, na wanzar da zaman lafiya tsakanin Sin da Amurka. (Saminu Alhassan)
