Sojojin Operation FANSAN YAMMA sun daƙile yunƙurin ’yan ta’adda na yin garkuwa da mutane a ƙauyen Unguwar Rogo, ƙaramar hukumar Kaura Namoda ta Jihar Zamfara.
Sojojin sun ceto mutane tara, ciki har da jariri, yayin farmakin da aka kai ranar Lahadi, 16 ga watan Agusta, 2026.
Jami’in hulɗa da manema labarai na rundunar haɗin gwiwa ta Arewa maso Yamma, Laftanar Kanal Aliyu Danja, ya ce a cikin wata sanarwa ranar Litinin cewa ana zargin wani fitaccen ɗan bindiga mai suna Mallam Shuaibu ne ya jagoranci kai harin.
Danja ya ce ’yan ta’addan sun ɓuya a cikin gonar gero sannan suka buɗe wa motocin da ke wucewa wuta, lamarin da ya sa wasu direbobi suka sarrafa motocinsu.
Ya ce sojoji sun isa wurin cikin gaggawa bayan samun kiran neman ɗauki, inda suka yi artabu da ’yan ta’addan tare da tilasta musu tserewa zuwa cikin daji.
Mata biyu sun samu raunukan harbin bindiga a yayin harin, kuma an garzaya da su asibiti domin samun kulawa.
Danja ya ce Operation FANSAN YAMMA za ta ci gaba da ƙoƙarin kare mutane da daƙile hare-haren ’yan ta’adda a yankin Arewa maso Yamma.
