Rundunar Sojojin Nijeriya ɓangaren Operation Fasar Yamma ta samu nasarar hallaka fitaccen ƙasurgumin ɗan ta’adda mai suna Auta tare da wasu mutane 13 a jihar Zamfara, kamar yadda shalƙwatar Tsaron Nijeriya ta bayyana.
Daraktan hulɗa da Jama’a na Rundunar Sojoji, Manjo Janar Markus Kangye, ya ce dakarun Mobile Strike Team (MST) sun gudanar da wani samame mai ƙarfi a ranar 10 ga Yuni, 2025, a yankin Ƙunchin Kalgo da ke ƙaramar hukumar Tsafe, inda suka hallaka waɗannan ‘yan ta’adda.
- Sojoji Sun Kashe Babban Kwamandan Boko Haram A Jihar Yobe
- Sojojin Sama Sun Tarwatsa Maɓoyar Ƴan Ta’adda, Ya Daƙile Hari Ranar Idi A Borno
Manjo Janar Kangye ya ce Auta da abokansa — Abdul Jamilu da Salisu — na daga cikin waɗanda aka kashe a wannan hari, kuma ana danganta su da aikata munanan laifuka da tashe-tashen hankula a yankin.
Har ila yau, bayanan sirri sun nuna cewa wasu shugabannin ‘yan ta’adda biyu, ciki har da wanda aka fi sani da Babayé, an kashe su a wannan farmaki. A wani samame daban, Sale Ado Madele (wanda ake kira Sarki), babban ɗan sanannen shugaban ‘yan bindiga Ado Alieru, shi ma ya rasa ransa.
Baya ga haka, Sojojin sun kashe ƙarin ‘yan ta’adda goma da suka taru kusa da wani gidan mai a Danjibga, waɗanda ake zargin sun kasance cikin wata tawagar da Dogo Sule ya tara domin kitsa hari. Manjo Janar Kangye ya jaddada cewa rundunar Soji za ta ci gaba da kare rayuka da dukiyoyin jama’a tare da tabbatar da zaman lafiya mai ɗorewa a Zamfara da yankin Arewa maso Yamma gaba ɗaya.
