Bayan tsawon shekaru na aiki tukuru, kasar Sin ta cimma nasarar kawar da matsanancin talauci tsakanin al’ummunta. Ya zuwa yanzu, gwamnatin kasar ta kammala dukkanin ayyuka masu nasaba da wannan aiki, ciki har da karfafa nasarori, da fadada matakan yaki da talauci yadda ya kamata, yayin da take kara ingiza farfado da yankunan karkara, da aiwatar da matakan dakile sake tsundumar al’ummun da suka riga suka tsira daga kangin fatara.
Nasarar da kasar Sin ta cimma a wannan yaki, ta baiwa kasar damar cimma kudurin rage fatara, dake cikin ajandar ci gaba mai dorewa ta MDD, ta nan zuwa shekarar 2030, inda Sin ta cimma wannan kuduri shekaru 10 gabanin wa’adin.
Yayin aiwatar da shirin raya kasa na shekaru biyar-biyar na Sin karo na 14, wanda aka aiwatar tsakanin shekarar 2021 zuwa 2025, daukacin gundumomin kasar Sin 832 da suka fice daga kangin talauci sun riga sun samar da masana’antu masu tasiri biyu zuwa uku, tare da samar da kudaden shiga da jimillarsu ta haura kudin Sin tiriliyan 1.7, kwatankwacin dalar Amurka biliyan 250.77. Hakan a cewar masana, na nuni ga yadda gwamnatin Sin ta cimma nasarar sauya matsayin yankunan karkarar kasar wadanda a baya suka sha fama da fatara, lamarin da ya zamo misali mai gamsarwa na yadda wata kasa ta cimma nasarar warware matsalar raya kai yadda ya kamata.
A daya bangaren kuma, baya ga nasarorin da kasar ta Sin ta cimma a cikin gida, tana kuma yin hadin gwiwa da sauran kasashe abokan tafiya musamman kasashe masu tasowa, ciki har da na nahiyar Afirka, wajen aiwatar da wasu ayyuka na yaki da talauci, a matsayin gudunmawar kwarewa da ta cimma a fannin.
Ko shakka babu nasarar da kasar Sin ta cimma a wannan fanni, ta nuna cewa sauran kasashen duniya ma musamman masu tasowa, za su iya kawar da matsanancin talauci, idan sun yi koyi da dabarun da Sin din ta aiwatar gwargwadon halin da suke ciki. Duniya ta ga yadda kasar Sin ta gwada basira, da juriya, da hangen nesa, da aiki ba tsayawa wajen cimma nasarar yaki da fatara wanda sakamakonsa ya baiwa kowa mamaki.
Hakan ne ma ya sanya masharhanta da dama ke ganin lokaci ya yi da sassan kasa da kasa, musamman kasashe masu tasowa, za su himmatu wajen koyi daga dabarun Sin na yaki da talauci, domin fitar da jaki daga duma.
Discussion about this post