Bisa gayyatar shugaban kasar Uganda Yoweri Museveni, wakilin musamman na shugaban kasar Sin Xi Jinping wato mista Losang Jamcan, ya halarci bikin rantsuwar kama aiki ta shugaba Museveni.
Bikin da ya gudana a ranar Talata a birnin Kampala fadar mulkin kasar Uganda.Shugaba Museveni, ya zanta da Losang Jamcan, wanda mataimakin shugaba ne a zaunannen kwamitin majalisar wakilan jama’ar kasar Sin a fadar gwamnatin Uganda.
Yayin tattaunawar a jiya Alhamis, Losang Jamcan ya gabatarwa shugaba Museveni da sakon taya murna da fatan alheri na shugaba Xi, yana mai cewa karkashin managarcin jagorancin shugabannin kasashen biyu a shekarun baya bayan nan, cikakkiyar dangantakar hadin gwiwa bisa manyan tsare-tsare tsakanin Sin da Uganda ta ci gaba da bunkasa bisa babban matsayi.
A nasa bangare kuwa, shugaba Museveni ya nemi Losang Jamcan da ya mika sakon gaisuwarsa ga shugaba Xi, yana mai gode masa bisa aikewa da wakilin musamman zuwa Uganda domin halartar bikin na rantsuwar kama aiki, kana ya jinjinawa turbar samun ci gaba ta kasar Sin, da ma kyakkyawar dangantakar dake tsakanin kasashen biyu. (Saminu Alhassan)
