Ministan Babban Birnin Tarayya (FCT), Nyesom Wike, ya fito fili ya ayyana kansa a matsayin babban kwamandan fagen fama (field commander) na yaƙin neman sake zaɓen Shugaba Bola Ahmed Tinubu a babban zaɓen 2027, musamman a Babban Birnin Tarayya da kuma Jihar Ribas.
Wike ya bayyana aniyarsa ta jagorantar dukkan tsare-tsare da injinan siyasa na kamfen ɗin Shugaba Tinubu a Abuja da kuma jiharsa ta asali wato Ribas, yana mai jaddada cewa zai tabbatar da gagarumar nasara ga shugaban ƙasar a dukkan yankunan biyu a akwatin zaɓe. Ya ce magoya bayan shugaban ƙasa daga matakai daban-daban na siyasa sun riga sun gama shirye-shiryen ƙaddamar da gagarumin kamfe domin tabbatar da nasararsa a karo na biyu.
A yayin da yake jawabi, Ministan ya fito ya kare tsare-tsaren sauye-sauyen tattalin arziƙi da gwamnatin Shugaba Tinubu ke aiwatarwa, inda ya amince cewa wasu manufofin sun jefa ƴan ƙasa cikin matsi da wahalhalu, sai dai ya jaddada cewa sauya fasalin tattalin arziƙin ƙasa “ba kamar addu’a ba ne” da za a ga sakamako nan take, yana mai nuni da cewa ɗaukar tsauraran matakai ya zama dole domin shawo kan matsalolin da suka daɗe suna ci wa ƙasar tuwo a ƙwarya.
Bugu da ƙari, Wike ya kuma nuna cikakken goyon bayansa ga shirin kafa rundunar ƴansandan jihohi (State Police), inda ya bayyana hakan a matsayin wata babbar dabara da za ta bayar da gagarumar gudunmawa wajen magance ƙalubalen rashin tsaro da ke ci gaba da addabar sassan Nijeriya daban-daban.
