Assalamu alaikum masu karatu, barkanmu da sake haduwa da ku a wannan makon a cikin shirin namu mai farin jini da albarka na Girki Adon Mata.
A yau shafin na mu zai koya muku yadda za ku hada funkaso na fulawa mai sauki a gida.
- Wakilin Sin Ya Soki Yadda Amurka Ke Tafiyar Da Kudurin Takunkuman Sudan Ta Kudu
- Gyaran Jiki Da Kyawun Fata (2)
Abubuwan da za ki tanada:
Fulawa, suga, gishiri, yis, baikin fauda.
Ga Yadda za ki hada:
Za ki samu fulawa kamar gwangwani uku, ki zuba a roba sannan ki zuba suga kamar babban cokali biyu, sai gishiri rabin karamin cokali sai yis babba cokali daya, sai ki zuba ruwan dumi kofi daya da rabi, ki kwaba shi ki jujjuya shi ko ina ya hade, ki dan bubbuga shi kamar na minti uku haka, daga nan sai ki rufe shi ki kai shi rana domin ya taso.
Sai ki hada miyar da za ki ci da shi
Ki samu alayyahi da tattasai da dan tumatur idan kina so da taruhu da man, albasa:
Ki soya manki da albasa sannan ki zuba kayan miyan wanda dama kin jajjaga su, ki soya sai ki zuba magi, gishiri, kori, sannan ki kawo namanki ki zuba ki jujjuya shi,
Idan suka soyu, bayan sun soyu sai ki kawo alayyahinki wanda dama kin yanka shi kin wanke shi ki zuba ki ci gaba da juyawa, idan suka hade jikinsu sai ki rufe ki bar shi ya dan yi minti biyar haka kafin nan alayyahun ya dahu. Ita wannan miyar ba’a samata ruwa. A ci dadi lafiya.
Sannan kwabun funkason ya tashi, sai ki dakko shi ki zuba baikin fauda ki bubbuga shi saboda iskar ta fita, sai ki dora mai a wuta, wasu suna fadada shi da hannu, wasu kuma suna samun murfin wani abu haka mai fadi su yi da shi ko filat haka su rika zubawa suna fadadawa sannan su jefashi a cikin mai, za ki ga yayi ja shin e ya soyu, sai ki juya saman shima ya soyu haka za ki yi har ki gama.
