Akalla mutane 40 ne aka sace a cocin Bege Baptist dake Madala kan titin Buruku Baringi Kaduna a karamar hukumar Chikun ta jihar a yayin gudanar da ibada a cocin a ranar Lahadin da ta gabata.
Shugaban kungiyar Kiristocin Nijeriya CAN reshen jihar Kaduna, Rabaran John Joseph Hayab wanda ya tabbatar da faruwar lamarin, ya ce masu ibadar suna cikin ibadarsu ta Lahadi a cikin Cocin da misalin karfe 9:30 na safe, kwatsam sai suka fara jin karar harbe-harbe da bindigogi a kusa da Cocin, “’yan bindigar sun kai hari Cocin kuma sun tafi da masu ibada 40.
“Amma a lokacin da suke tafiya da su, Mutum 15 daga cikin wadanda aka yi garkuwa da su sun tsere, 25 suna hannun masu garkuwan kuma har yanzun babu wani labarinsu daga ‘yan bindigar.” inji shi.
Har yanzu dai gwamnatin jihar Kaduna da rundunar ‘yan sandan ba su fitar da wata sanarwa a hukumance kan lamarin ba, kuma da aka tuntubi kakakin rundunar ‘yan sandan jihar, DSP Mohammed Jalige bai amsa kiran ba kuma bai kira ba har zuwa lokacin buga wannan rahoton.
