Kimanin mutane uku ne aka kashe a kauyen Bakiyawa da ke karamar hukumar Batagarawa a jihar Katsina a lokacin da wasu ‘yan bindiga da ake zargin ‘yan ta’adda ne suka mamaye yankin.
Wata majiya ta bayyana cewa an harbe wani mutumin kauyen a kafa yayin da wata matar aure mai suna Hawawu Yusuf ‘yar Ungwar Makera kuma maharan suka yi garkuwa da ita.
A cewar majiyar wanda mazaunin unguwar ne, maharan sun kai farmaki kauyen ne da misalin karfe 4:00 na yammacin ranar Litinin, inda suke kan babura, inda suka yi nasarar kai harin na kusan mintuna 30 a yankin.
Ya kuma bayyana sunayen wadanda aka kashe a harin da suka hada da Aminu Abdulwahab da Musa Abubakar sai Sadiq Lawal.
Majiyar ta bayyana cewa: “A ‘yan kwanakin nan muna ganin yadda ‘yan bindiga suka kai hari a yankinmu. A dai dai mako guda da ya gabata da misalin karfe 2:30 na rana, ‘yan bindiga sun kai hari a unguwarmu tare da yin garkuwa da mutane shida. Wadanda aka kashe din dai har yanzu suna cikin dajin kasancewar babu wanda aka sako daga cikinsu.
“A ranar Lahadi kuma, an yi garkuwa da daya daga cikin matasan unguwar kuma har yanzu ba a sake shi ba. A jiya Litinin da karfe 4 zuwa 4:30 na yamma, ‘yan bindigar sun sake kai farmaki cikin jama’ar inda suka kashe mutane uku.” Cewar majiyar.
