Shugaban kasar Sin Xi Jinping ya gana da shugaban Sabiya Aleksandar Vucic a ran 25 ga watan nan da muke ciki, inda suka amince da ci gaba da zurfafa cikakken dangantakar hadin gwiwa bisa manyan tsare-tsare a tsakaninsu, tare da ci gaba da gina kyakkyawar makomar al’ummar Sin da Sabiya a sabon zamani.
Manazarta na ganin cewa, matakin ya kara sabon karfi ga zurfafa hadin gwiwar Sin da Sabiya.A wannan tattaunawar, shugaba Xi ya jaddada cewa, ya kamata bangarorin biyu su karfafa mu’ammala da aminci a siyasance da zurfafa hadin gwiwa da goyon bayan juna, tare da hada kai don bin hanyar da za ta kai ga samun makoma ta bai daya mai kyau, da kuma ciyar da cikakken dangantakar hadin gwiwa bisa manyan tsare-tsare tsakaninsu zuwa sabon matsayi.
Shi ne bukatunsu na cikin gida na samun ci gaba, kuma zabi ne da ya zama dole yayin da kasa da kasa ke cikin yanayi mai sarkakiya.
Mutuntawa da aminci da juna shi ne tushen huldar kasashen biyu. A karkashin jagorancin shugabannin kasashen biyu bisa manyan tsare-tsare, amincin Sin da Sabiya na kara karfi.
Abin da ya jawo hankali sosai a yayin ziyarar Vucic a wannan karo shi ne, a ran 25 ga wata, shugaba Xi ya gudanar da bikin baiwa shugaba Vucic lambar yabo ta “abota”.
Wannan ba wai kawai babban yabo ne ga gudunmawar da shugaba Vucic ya bayar ga abotar Sin da Sabiya ba, har ma yana kunshe da kyakkyawan fata na al’ummomin kasashen biyu game da gina kyakkyawar makomar al’ummar Sin da Sabiya ta bai daya a sabon zamani, kuma ya shaida babban matakin amincin Sin da Sabiya bisa manyan tsare-tsare. (Amina Xu).
