Kasashe da dama na nahiyar Afirka sun jima da kulla dangantakar cinikayya da China, ta yadda zai kasance abu mawuyaci a samu gidan da ba a amfani da kayan da aka kera a kasar Sin. To sai dai sakamakon kakagidan da dalar Amerika ta yi a harkokin cinikayya na kasa da kasa ya sanya ake samun tarnaki a harkokin kasuwanci tsakanin wannan kasa da waccan kasa.
Tun fil azal, akwai dadaddiyar alakar cinikayya tsakanin China da Nijeriya, hasali ma dai China ita ce babbar kasa da ta fi kowace kasa huldar kasuwanci da Nijeria. Hada-hadar kasuwanci tsakanin China da Nijeriya ta kasance mai armashi, kuma mai amfanar dukkan bangarorin biyu. Bisa ga wannan dalili ne China da Nijeriya suka ga akwai bukatar rage dogaro da dalar Amerika wajen gudanar da cinikayya tsakaninsu.
- Gwamnan Sakkwato Ya Kaddamar Da Aikin Gina Gidaje 500 Don Rage Matsalar Rashin Gida
- Bilicin: NAFDAC Ta Kama Mutane 6, Ta Rufe Shaguna A Kano
Don haka kasashen biyu suka kirkiro da wani tsari kan yarjejeniyar musayar kudadensu, abin da zai baiwa Nijeriya damar yin amfani da Yuan, wato Renminbi kai tsaye wajen sayen kayayyaki daga China ba tare da yin amfani da dalar Amerika ba. An ko kirkiro da wannan tsari ne tun watan Afrilun shekarar 2018, wanda aka sabunta a watan Afrilun shekarar 2021, sannan kuma aka sake sabunta shi a karshen watan Disamban shekarar 2024.
Kudin Sin Yuan ya kasance daya daga cikin kudaden da hukumar bayar da lamuni ta kasa da kasa IMF ta amince da su. Wannan karbuwa da Yuan ta samu ya kara daga darajarta tare da samun karbuwa tsakanin kasashen duniya.
Aiwatar da wannan tsari yadda ya kamata, zai bunkasa cinikayya tsakanin Nijeriya da kasar Sin, tattalin arzikin Nijeriya zai samu tagomashi tare da samun karuwar aikin yi ga miliyoyin ’yan Nijeriya. Kana zai habaka zuba jari a fannoni daban daban tsakanin kasashen biyu, tare da rage dogaro da dalar Amerika. Wannan zai baiwa China da Nijeriya damar yaukaka dangantaka ta fannin kudade ta yadda hada hadar cinikayya za ta kasance babu tarnaki. ( Lawal Mamuda)
