Majalisar Wakilai a ranar Talata, ta yanke shawarar yin bincike kan yadda aka yi watsi da cibiyoyin ci gaban masana’antu (IDC) sama da 30 a fadin kasar nan.
Majalisar ta umurci kwamitinta kan masana’antu da ya binciki yadda aka yi watsi da su tare da ba da shawarar yin amfani da cibiyoyin da suka dace don manufofinsu tare da bayar da rahoto cikin makonni hudu don ci gaba da aiwatar da doka.
- NNPC Ta Gaza Halartar Zaman Binciken Majalisa Kan Ɓatan Naira Tiriliyan 210
- Majalisa Na Binciken Yadda Aka Kashe Naira Tiriliyan 1.12 Na Tallafin Manoma
Kudurin ya biyo bayan amincewa da kudirin da dan majalisar wakilai mai wakiltar mazabar Onitsha ta Arewa/Kudu na Jihar Anambra, Hon. Emeka Idu, ya gabatar a zauren majalisa.
Idu ya lura cewa an kafa IDC sama da 30 a shekarun 1970 tare da manufar ba da taimako ga kanana da matsakaitan masana’antu.
Dan majalisar ya ce duk da cibiyoyin shiyya hudu da ke Osogbo, Owerri, Zariya da Maiduguri, ba za a iya cewa kasar ta ci gajiyar kafa su ba.
Ya kara da cewa, babban makasudin kafa cibiyoyin da kudaden jama’a shi ne bunkasa masana’antu, da rage bukatar musayar kudaden waje, da samar da fa’idoji masu yawa ga kasar nan.
Idu ya ce IDCs, musamman Cibiyoyin shiyyoyi hudu, sun cika da manyan injina don yada ilimin fasahar masana’antu da fasahar da za su yi tasiri matuka kan yunkurin kasar na samar da masana’antu.
Ya bayyana damuwarsa cewa, “A tsawon shekaru, kusan dukkanin IDCs, ma’aikata da kayan aiki a yi asarar su kuma wasu kayan aikin sun daina aiki.
“Duk da cewa gwamnatin tarayya ta mika wadannan cibiyoyi ga hukumar kula da masu kananan sana’o’i ta kasa (SMEDAN) tsawon wasu shekaru a yanzu, babu wani abin da aka yi gaba daya don gyara wadannan cibiyoyi a halin da ake ciki.
“Idan ba a duba wannan yanayin ba, kasar za ta ci gaba da rasa moriyar masana’antu, wanda hakan zai shafi yanayin rayuwar jama’a.”
