Dan majalisar tarayya mai wakiltar Kabba-Bunu da Ijumu, na jihar Kogi a majalisar wakilai, Salman Idris, ya sauya sheka daga jam’iyyar African Democratic Congress (ADC), zuwa jam’iyyar All Progressives Congress (APC) mai mulki.
Arc. Idris, cikin wata wasika da ya aike wa shugaban majalisar, Hon. Tajudeen Abbas, wanda ya karanta a zauren majalisar yau Talata, ya ce matakin nasa ya biyo bayan tuntuɓar da ya yi da masu ruwa da tsaki a mazabarsa ta tarayya.
- Majalisa Ta Amince N70,000 A Matsayin Sabon Mafi Karancin Albashi
- An Yi Wa Matashi Daurin Rai Da Rai Kan Yi Wa Kurma Fyade A Kebbi
A cewarsa, matakin ya kuma biyo bayan kiraye-kirayen da al’ummar mazaɓarsa suka yi na su haɗa kai da jam’iyyar siyasar da za ta fi dacewa da ɗabi’u da manufofinsu na siyasa baki daya.
An ambato shi cikin wasiƙar ya na mai sanar da shugaban majalisa da abokan aiki cewa, saboda rikicin shugabanci a cikin jam’iyyar ADC, ya yanke shawarar sauya sheƙa bayan nazari da tuntubar masu ruwa da tsaki na mazabar Kabba-Bunu da ljumu da jihar Kogi baki daya.
