Jigo a jam’iyyar PDP Umar Sani, ya yi iƙirarin cewa tsohon Shugaban Ƙasa, Goodluck Jonathan, ya sayi fom ɗin takarar shugaban ƙasa na jam’iyyar gabanin zaɓen 2027.
Sani ya bayyana hakan ne a ranar Talata yayin wata hira da aka yi da shi a Trust TV, inda ya ce matakin Jonathan na nuna cewa yana shirin komawa siyasa.
Ya ce sayen fom na takara muhimmin mataki ne ga duk wanda ke da niyyar shiga zaɓe.
A cewarsa, Jonathan ya riga ya sayi fom ɗin kuma ana sa ran zai miƙa shi a fili nan ba da jimawa ba.
Sani ya kuma ce yana da tabbacin duk wani ƙalubalen shari’a da ke ƙoƙarin hana Jonathan takara ba zai yi nasara ba a kotu, yana mai cewa an riga an yanke irin wannan hukunci a baya.
Ya kuma musanta iƙirarin cewa ana amfani da sunan Jonathan don samun kulawar siyasa, yana mai cewa har yanzu da dama a Nijeriya na tuna mulkinsa da ya yi mai nagarta.
Jonathan ya mulki Nijeriya daga 2010 zuwa 2015 kafin ya sha kaye a zaɓen 2015 a hannun tsohon Shugaban Ƙasa, marigayi Muhammadu Buhari.
