Amurka da Iran sun cimma matsaya kan tsagaita wuta na tsawon mako biyu, a wani yunƙuri na rage tashin hankali da ya ƙaru a yankin Gabas ta Tsakiya, duk da cewa yarjejeniyar na ɗauke da sharuɗɗa masu muhimmanci daga ɓangarorin biyu.
Shugaban Amurka, Donald Trump, ya bayyana cewa zai amince da tsagaita wutar ne kawai idan aka ba jiragen ruwa damar zirga-zirga cikin walwala a mashigar Strait of Hormuz, wadda ke da matuƙar muhimmanci ga jigilar man fetur a duniya.
- Amurka_Isra’ila Akan Iran: Rikicin Gabas ta Tsakiya Ya Fara Daukar Sabon Salo
- Shugaba Xi Ya Bukaci A Karfafa Karfin Sin A Bangarorin Ilimi Da Kimiyya Da Fasaha Da Masu Basira
A nasa ɓangaren, Ministan Harkokin Wajen Iran, Abbas Araghchi, ya ce ƙasarsa za ta amince da dakatar da faɗa ne idan aka daina kai mata hare-hare, yana mai jaddada cewa tsaro da mutuncin Iran ba za su zama abin wasa ba a tattaunawar.
A lokaci guda, ƙasar Israel ta nuna goyon baya ga matakin dakatar da hare-haren, amma ta bayyana cewa yarjejeniyar tsagaita wutar ba ta shafi yankin Lebanonba, abin da ke nuna cewa rikicin na iya ci gaba a wasu wurare duk da wannan matsaya.
Rahotanni sun kuma nuna cewa Pakistan na taka rawa a matsayin mai shiga tsakani, inda ta buƙaci a tsawaita wa’adin tattaunawar tare da gayyatar ɓangarorin biyu zuwa birnin Islamabad domin tattaunawa, sai dai masana na ganin ƙarancin yarda tsakanin Amurka da Iran na iya kawo cikas ga nasarar wannan yunƙuri.
Bayan sanar da tsagaita wutar, farashin man fetur a kasuwannin duniya ya faɗi ƙasa sosai, yana sauka ƙasa daga dala 100 a ganga, lamarin da ke nuna yadda kasuwannin duniya ke saurin nuna sauyi ga duk wani abu da ya shafi tsaron makamashi da kwanciyar hankali a yankin.
