Sin da Afirka sun kaddamar da shirye-shiryen hadin gwiwa a sashen likitanci jiya Litinin, da nufin sabunta ayyukan kiwon lafiyar al’ummar nahiyar, a matsayin wani bangare na zurfafa tsarin hadin gwiwa a aikace game da kiwon lafiyar jama’a na Sin da Afirka.
Taron wanda aka shirya bisa hadin gwiwa tsakanin Asibitin Xiangya na Jami’ar Tsakiyar Kudanci ta kasar Sin, da Babban Asibitin Hanyar Siliki na Addis Ababa, da kuma Asibitin Kawancen Sin da Afirka, ya kasance na kaddamar da shirin hadin gwiwa na Sin da Afirka a bangaren likitancin warkar da marasa lafiya ta hanya mai sauki, tare da kaddamar da cibiyar horaswa kan tiyatar mutum-mutumin na’ura ta Sin da Afirka, da kuma cibiyar horaswa kan fasahar duba marasa lafiya ta hanyar amfani da kananan kayan aiki masu kamara ta Sin da Afirka.
Da yake jawabi ga mahalarta taron, shugaban kasar Habasha, Taye Atske Selassie ya jaddada muhimmancin shigar da fasahar zamani da kuma samar da kwararrun ma’aikatan kiwon lafiya a bangaren kula da lafiyar al’umma.
Musamman ma, shugaban ya yaba wa masu horaswa da likitoci na kasar Sin saboda jajircewarsu wajen bayar da horo da ilimi da kuma kwarewa, inda ya bayyana hakan a “matsayin mataki mai matukar muhimmanci wajen inganta ayyukan kiwon lafiyarmu, da samar wa da kawunanmu sararin amfani da sabuwar fasaha, da kuma zama a sahun gaba ta fuskoki da dama.”
Ana sa ran sabbin shirye-shiryen da aka kaddamar za su zurfafa hadin gwiwa na dogon lokaci tsakanin cibiyoyin kiwon lafiya na Sin da Afirka ta hanyar habaka samar da kwararru na musamman ga Afirka ta fuskar ba su jagoranci cikin tsari, da horaswa bisa amfani da na’urar kwaikwayon abubuwa tamkar na gaske, da koyarwa da duba marasa lafiya a aikace a fannin dabarun tiyata na kananan kayan aiki masu kamara da na mutum-mutumin na’ura.
A yayin taron dai, kimanin masu samun horo 40 daga kasashen Sudan, Tanzania, Uganda, Ghana, Libya, da Habasha sun shiga cikin shirin horaswa na farko kan fasahar amfani da kananan kayan aiki masu kamara wanda kwararru na kasar Sin suka gudanar. (Mai fassara: Abdulrazaq Yahuza Jere)
