Sin Ta Yi Kira Da Zurfafa Hadin Kai A Babban Taron IAEA
A jiya Litinin ne aka bude babban taro karo na 70, na hukumar lura da makamashin nukiliya ta kasa da kasa wato IAEA a birnin Vienna dake Austria. Da yake jawabi a yayin taron, shugaban hukumar makamashin nukiliya ta Sin Shan Zhongde, ya ce amfani da makamashin nukiliya cikin lumana ya shafi jin dadin dukkan bil’adama, wanda hakan ya sa ya fi muhimmanci ga dukkan bangarorin su tsaya tsayin daka kan goyon bayan ra’ayin cudanyar bangarori daban-daban, da kuma kara zurfafa hadin kai tsakanin su. Shan ya kara da cewa, Sin ta dage wajen bunkasa makamashin nukiliya cikin tsari da tsaro, kuma ta daidaita ci gaban da ke da alaka da kirkire-kirkire da tsaro, da kuma gudanar da hadin gwiwa a bude. A nan gaba, Sin za ta mayar da hankali kan muhimman fannoni guda hudu, na farko shi ne daidaita ci gaba, da tsaro don fadada sabbin fannoni, da nufin yin hadin gwiwar makamashin nukiliya. Na biyu kuma, za ta tabbatar da dorewar ci gaba cikin tsaro, don kiyaye tsaron nukiliya na duniya. Na uku kuma, za a bi tsari mai amfanar da mutane, don inganta kimiyya da fasahar nukiliya, ta yadda za su kawo alherai ga jama’a. Kana na karshe, za a aiwatar da manyan tsare-tsare guda hudu na duniya, don inganta tsarin shugabancin duniya. (Safiyah Ma)
