An gudanar da taro kan zamanantar da kasashe masu tasowa na 2026, a birnin Alkahiran Masar, inda aka yi masa taken “Tasowar Fasahar AI: Damarmaki da Kalubalen Zamanatar da Kasashe Masu Tasowa.”  Sama da masana da malamai 100 daga kasashe da yankuna 30 ne suka halarci taron da ya gudana jiya Laraba. A cewar mahalartan, kirkire-kirkire a fannin fasahar AI na gabatar da dimbin damarmaki, yayin da kuma yake tattare da kalubalen shugabanci.  A yayin taron BRICS na 18 da ya gudana a farkon watan Satumba, shugaban kasar Sin Xi Jinping, ya gabatar da muhimman shawarwari domin amfani da AI wajen karfafa sabon tsarin ayyukan masana’antu da inganta samar da AI mai budadden tsari da ci gaban AI na bai daya, wadanda suka zayyana alkiblar raya fasahar AI da za ta yi kyakkyawan tasiri ga kowa.   Mahalarta taron sun kara da cewa, fasahar AI wata haja ce ta dukkan jama’a, suna masu bukatar kasashe masu tasowa su yi amfani da wannan gagarumar dama domin amfani da AI wajen karfafa mabambantan masana’antu da inganta rayuwar jama’a.  Sun kuma yi kira da a inganta shugabantar fasahar AI a duniya da aiwatar da hadin gwiwa na hakika tsakanin bangarori da dama da cike gibin da ke akwai a fannin AI da tabbatar da ci gaba da tsaro suna tafiya tare, kafada da kafada. (Fa’iza Mustapha) 

Mai magana da yawun ma’aikatar harkokin wajen kasar Sin Guo Jiakun, ya ce kamata ya yi sassan kasa da kasa...

A yau Laraba ne cibiyar binciken harkokin ci gaba dake karkashin majalisar gudanarwar kasar Sin, ta fitar da rahoton ci...

A gobe Alhamis ne za a wallafa rubutaccen jawabin babban sakataren kwamitin tsakiya na JKS kana shugaban kasar Sin, wanda har ila yau shugaban kwamitin tsakiya na ayyukan soji na kasar, Xi Jinping, wanda ya yi kan bunkasa rayuwa da walwalar jama’a.  Za a wallafa rubutaccen jawabin ne a mujallar Qiushi fitowa ta 19 ta wannan shekarar, wanda aka tattaro daga muhimman batutuwan da shugaban ya tattauna akai tsakanin watan Nuwambar shekarar 2012 zuwa Janairun shekarar nan. (Suleiman Suleiman) 

Shugaban kasar Sin Xi Jinping, ya yi kira ga al’ummun kasarsa, da su zage damtse cike da kwarin gwiwa, da bin matakai masu kwari na cimma nasarar matakan farfado da kasa.  Xi, wanda kuma shi ne babban sakataren kwamitin kolin JKS, kana shugaban hukumar koli ta rundunar sojojin kasar Sin, ya yi wannan kira ne a Larabar nan, ciki jawabin da ya gabatar a babban zauren taruwar jama’a dake nan birnin Beijing, yayin liyafar murnar cika shekaru 77 da kafuwar jamhuriyar jama’ar kasar Sin.  Shugaba Xi, ya jaddada cewa ta hanyar shafe tsawon lokaci ana bincike da gwaji, tsarin gurguzu mai halayyar musamman ta Sin ya shaida muhimmin tasiri da yake da shi. Kazalika, tsarin zamanantarwa na gwamnatin Sin, da ikon jagoranci sun ci gaba da kyautata, kuma cimma nasarar farfado da kasar Sin bisa babban matsayi ya zamo wani kuduri da bai zai sauya ba.   A gobe Alhamis daya ga watan Oktoba ne ake gudanar da bikin cika shekaru 77 da kafuwar jamhuriyar jama’ar kasar Sin. (Saminu Alhassan) 

Bana, shekara ce ta cika shekaru 90 da cimma nasarar wani kuduri na kishin kasa da ake wa lakabi da...

A yau Laraba da safe, an kaddamar da bikin aza kwandunan furanni na karrama ’yan mazan jiya albarkacin ranar jaruman kasa a filin Tian’anmen dake birnin Beijing, inda manyan shugabannin Jam’iyyar Kwaminis ta kasar Sin da na kasa, da suka hada da Xi Jinping da sauransu, da kuma wakilai daga bangarori daban daban, suka halarci bikin.  Da karfe 10 na safiyar yau, aka fara bikin a hukumance. Shugaba Xi Jinping da manyan jami’an JKS da na kasa, sun hau kan dandamalin wurin tunawa da jaruman kasa, sa’an nan, suka tsaya a gaban kwandunan furannin. Daga bisani, Xi Jinping ya matsa gaba don gyara ribon din dake kan kwandunan furanni. Bayan haka, Xi Jinping da sauran shugabannin JKS da na kasa sun yi tafiya a hankali suna zagaya wurin tunawa da jaruman na kasa domin nuna girmamawa.  Bana, shekara ce ta cika shekaru 105 da kafuwar Jam’iyyar Kwaminis ta kasar Sin, kana shekara ce ta cika shekaru 90 da cimma nasarar Doguwar Tafiya ta jar rundunar sojojin kasar Sin. Bisa jagorancin kwamitin tsakiyar JKS dake karkashin jagorancin shugaba Xi Jinping, dukkanin ’yan jam’iyyar da sojoji da kuma al’ummomin kabilu daban daban a kasar Sin, suna bin ruhin kafuwar JKS, da ruhin Doguwar Tafiya mai girma, inda suka nuna kwarin gwiwa da yin hadin gwiwa, domin gina kasa mai karfi da neman farfadowar kasa a dukkanin fannoni ta hanyar zamanantarwa. (Mai Fassara: Maryam Yang) 

A yau Laraba ne jiragen fasa dusar kankara na kasar Sin wato Xuelong da Xuelong 2, ko kuma Snow Dragon da Snow Dragon 2 suka komo birnin Shanghai da ke gabashin kasar Sin, bayan shafe kusan watanni uku a balaguron binciken yanayi karo na 16 a yankin tekun Arctic.   Jiragen sun yi nasarar kammala muhimman ayyuka, wadanda suka hada da cikakken bincike da sanya idanu, hadin gwiwa tsakanin kasa da kasa, da kuma karfafa binciken kimiyya, inda tawagar masu binciken ta shaida cewa an samu nasara sosai a duka binciken da aka gadunar.  An cimma gagarumar nasara yayin balaguran, musamman ta fuskar gano sabbin abubuwa na kimiyya, da gagarumin ci gaba a fahimtar ka’idojin nazarin kimiyya, da gwaje-gwajen fasaha da amfani da kayan aikin bincike wadanda za su taimaka wajen fahimta da kuma magance kalubalan sauyin yanayi da kuma samar da ci gaba mai dorewa a yankin Actic.(Mai fassara: Suleiman Suleiman) 

Kwanan nan, an kammala gasar nuna kwarewar sana’o’i ta duniya karo na 48 cikin nasara a birnin Shanghai dake gabashin kasar Sin. A fagen gasar, tawagar Sin ta shiga sahun gaba a duniya a fannoni da dama, tun daga injin da na'ura mai kwakwalwa ke sarrafawa zuwa mutum-mutumin inji na masana’antu, da fasahar walda, gami da aikin gini bisa fasahar zamani. Amma abin da ya fi jawo hankula shi ne, tsarin da Sin take da shi waje raya wadannan fasahohi, da rawar da wannan tsarin ke takawa ga hadin gwiwar kasashe masu tasowa, matakin da zai canza makomar matasan Afirka.  Kwarewar da Sin ta nuna a gasar ta dogara ce kan cikakken tsarin horar da kwararrun fasaha. Ya zuwa yanzu, makarantun sana’o’i na Sin sun wuce 10,000, kana daliban da ke karatu a cikinsu yawansu ya wuce miliyan 33, ban da haka, jimillar kwararrun fasaha a duk kasar ta haura miliyan 200. Daga cikinsu kwararrun fasaha mafi hazaka sun wuce miliyan 72. Ruhin wannan tsari shi ne, kwarewar fasaha ba tana ginuwa a kan “hanyar da za a bi idan babu sauran mafita” ba ce, sai dai a kan turbar samun “mafita mafi kyau”. A Sin, adadin samun aikin yi na daliban da suka kammala makarantun fasahar ya dade yana zarce sama da kashi 95% a ko wace shekara. Sin ta tabbatar da cewa, matukar ana mallakar fasaha, to za a rika samun mafita.  Matasan Afirka ma sun hau wannan hanya.   A wannan gasar, Afirka ta Kudu ta tura masu fafata gasar su 29 don shiga rukunan fasaha 27 na gasar. Kasar Namibia ta tura matasa 17 don fafatawa a ayyuka 16. Kana Uganda ma ta tura masu fafatawa 3 a fagen jinya da walda da dafa abinci. Duk da cewa yawan masu shiga gasar ba shi da yawa, amma kasashen Afirka sun fara bayyana karfinsu a wannan bangare. Sin na son raba damammaki da more fasahohinta da kasashe masu tasowa, musamman kasashen Afirka, don tabbatar da huldar hadin gwiwa mai amfani ga kowa. Hadin gwiwar fasaha na zama sabuwar hanyar hadin gwiwar Sin da Afirka.  Afirka na da dimbin matasa. A cewar Majalisar Dinkin Duniya, sama da kashi 60% na al’ummar yankin kudu da hamadar Sahara na Afirka suna kasa da shekaru 25 da haihuwa ne. Zuwa shekarar 2030, rabin yawan karin ’yan kwadago na duniya da za a samu zai fito ne daga wannan yankin. Amma, kashi 98% na ’yan Afirka da ba su kai shekaru 18 ba, ba su mallaki fasahar STEM, wato kimiyya da fasaha da injiniyanci da lissafi bayan kammala karatunsu ba. Abin da Afirka ke matukar bukata shi ne kwarewar “Fasahohin sana’o’i”. Hakan ya sa hadin gwiwar Sin da Afirka samun wata sabuwar hanya mafi dacewa.  Cibiyar Luban wani mataki ne dake karkashin wannan tsari na hadin gwiwa. Tun daga shekarar 2016, Sin ta kafa cibiyoyin Luban a kasashe da dama a Afirka, inda kasar ta ba da horon sana’o’i kamar kera kayayyaki ta amfani da injin da na'ura mai kwakwalwa ke sarrafawa da aikin lantarki da na walda da sarrafa mutum-mutumin inji da sauransu. A Djibouti, cibiyar Luban ta bude sashen kula da harkokin jirgin kasa, don horar da kwararrun fasaha na cikin kasar domin layin jirgin kasa mai hada Addis Ababa da Djibouti. A Masar, cibiyar Luban ta bude kwasa-kwasan sarrafa inji mai kwakwalwa da mutum-mutumin inji na masana’antu. A Kenya kuwa, cibiyar Luban tana ba da horo a kan fasahohin zamani ta yadda matasan za su zama masu fasaha bayan kammala samun horo.  ’Yan kasar Sin da suka fafata gasar, wadanda suka tsaya kan dandalin lambar yabo a wannan gasa, da kuma matasan Afirka da suke samun horo a cibiyar Luban, dukkansu sun ci gajiyar tsarin horar da kwararrun fasahohin sana’o’i da Sin ta aiwatar. Sin ta dauki shekaru da dama wajen tabbatar da bai wa matasa makoma mai kyau bisa wannan mataki, kuma a yanzu tana raba dabarunta ga kasashen Afirka ta hanyar hadin gwiwar kasashe masu tasowa. Samun lambobin zinari a gasar ya sheda nasarar wannan tsari, amma ma’ana mafi zurfi ita ce a ba mutane da yawa damar mallakar fasahohin.  Fasaha ba ta da iyaka, kuma ba za a bar kowa a baya ba a wannan bangare. Lokacin da masu sana’a na Sin ke samun lambobin a dandalin duniya, matasan Afirka ma za su iya koyon sana’a iri daya, ta hakan za su sami mafitarsu.(Marubuciya: MINA) 

A yau ne ake bikin ciki shekaru 54 da fitar da sanarwar hadin gwiwa ta Sin da Japan. Albarkacin ranar, mai magana da yawun ma’aikatar harkokin wajen kasar Sin Guo Jiakun, ya ce kundayen siyasa hudu wadanda Sin da Japan suka amincewa, ciki har da sanarwar hadin gwiwa, sun kafa wani tushen siyasa, da shari’a a alakar Sin da Japan, sun kuma kafa dokokin inganta matakan warware manyan batutuwa dake jan hankulansu, ciki har da tarihi da batun yankin Taiwan.   Guo ya ce bai kamata a jirkita tarihi, ko a mayar da hannun agogo baya ba, kana bai dace a illata wadannan ka’idoji ba. Ya kara da cewa tarihi ya sha nanata cewa, ta hanyar amincewa da ruhin kundayen siyasa hudu ne kadai Sin da Japan, za su iya wanzar da kawance bisa turba ta gari.   Jami’in ya ce, “A wannan rana mai tarihin musamman, muna sake kira ga masu jagorantar gwamnatin Japan, da su yi waiwaye matuka kan tarihi, su gyara kurakuransu, kana su aiwatar da matakai na hakika don komawa dalilai, da kudurin kundayen siyasan nan guda hudu.  (Saminu Alhassan)