Kamfanin Simintin Dangote, masana'antar Gboko, ya bayar da tallafin karatu na miliyoyin Naira ga daliban manyan makarantu da na sakandare...

Rukunin Kamfanin Dangote ya sake jaddada muhimmiyar rawar da samar da kayayyaki a cikin gida ke takawa wajen karfafa juriyar tattalin arzikin Nijeriya.  Kamfanin ya bayyana hakan ne a karshen mako ta bakin Babban Manajan Kamfanin, Mista Abdullahi Bello Danmusa, wanda ya wakilci Daraktan Yanki/Mai Ba Shugaban Kamfanin Dangote, Fatima Wali-Abdurrahman, shawara a Ranar Musamman ta Dangote a bikin Baje Kolin Kasuwanci na Abuja da ake gudanarwa.  Da yake magana a yayin bikin baje kolin na bana mai taken, “Juriyar Tattalin Arziki: Ciniki, Haraji da Tattalin Arziki,” Mista Danmusa ya ce haraji na daga cikin muhimman ginshikan ci gaban kasa, yana mai cewa Kamfanin Dangote na daukar nauyin biyan harajinta da muhimmanci, kuma yana samar da makudan kudaden shiga ga gwamnati duk shekara, tare da tallafa wa samar da ayyukan yi, bunkasa sana’o’i da kirkirar darajar tattalin arziki a dukkan ayyukansa.  Ya ce ciniki zai iya haifar da babbar fa’ida ga tattalin arziki idan aka tallafa masa da karfin samar da kayayyaki a cikin gida.  Ya ce: “Ciniki ya fi ma’ana idan aka tallafa masa da samar da kayayyaki. Babu wata kasa da za ta iya ginuwa kan juriyar tattalin arziki mai dorewa ta hanyar dogaro fiye da kima da kayayyakin da ake shigowa da su daga kasashen waje, wadanda za ta iya samarwa cikin gasa a cikin gida.  “Wannan shi ne dalilin da ya sa Kmfanin Dangote ke ci gaba da zuba jari a masana’antu da karfin samar da kayayyaki a fannonin siminti, sukari, gishiri da kayan kara dandano, masarufi, takin zamani, sinadaran petrochemical da tace albarkatun man fetur.  “Taken bikin Baje Kolin Kasuwanci na bana shi ne, ‘Juriyar Tattalin Arziki: Ciniki, Haraji da Tattalin Arziki,’ ya yi daidai da hakikanin yanayin da muke ciki a wannan lokaci.”  Ya ce: “Juriyar tattalin arzikin Nijeriya a karshe za ta dogara ne da wani muhimmin zabi: ko mu ci gaba da shigo da kayayyakin da za mu iya samarwa a cikin gida, ko kuma mu gina karfin da zai ba mu damar samarwa, yin gogayya da sauran kasashe da fitar da kayayyaki zuwa kasashen waje.”  Danmusa ya lura cewa karfafa karfin masana’antun cikin gida zai taimaka wajen fadada harkokin tattalin arziki, samar da ayyukan yi, tallafa wa ’yan kasuwa na cikin gida da kuma rage dogaro da kayayyakin da ake shigowa da su daga kasashen waje fiye da kima.  Ya kara da cewa jarin da Kamfanin ya zuba a fannoni daban-daban ya nuna jajircewarta wajen tallafa wa bunkasar masana’antun Nijeriya da kuma bayar da gudummawa wajen gina tattalin arziki mai inganci da juriyar fuskantar kalubale.  Shi ma da yake magana a Ranar Musamman ta Dangote, Mataimakin Shugaban Farko na kungiyar ’Yan Kasuwa ta Abuja (ACCI), Farfesa Adebisi Adesugba, ya yaba wa Kamfanonin Dangote bisa gudummawar da suke bayarwa ga ci gaban tattalin arzikin Nijeriya.  Adesugba, wanda ya wakilci Shugaban ACCI, Emeka Obegolu, SAN, ya ce hadin gwiwar da ke tsakanin Dangote da kungiyar ya nuna muhimmanci matuka.  Ya lura cewa jarin da Dangote ya zuba a fannoni masu muhimmanci, ciki har da siminti, takin zamani, noma, tace man fetur da sinadaran petrochemical, ya taimaka wajen karfafa karfin samar da kayayyaki a cikin gida, samar da guraben ayyukan yi, rage dogaro da kayayyakin da ake shigowa da su daga kasashen waje da kuma taimakawa wajen samar da kudaden waje.  Ya ce: “ACCI na kallon Dangote ba kawai a matsayin mai baje koli da mai daukar nauyin taron ba, har ma a matsayin abokin hulda na dabarun kasuwanci.”  Ya ce hadin gwiwar da ke tsakanin ACCI da Dangote ya taimaka wajen samar da damammaki ga ’yan kasuwa da ’yan kwazo, tare da tallafa wa harkokin ciniki, zuba jari da ci gaban tattalin arziki mai dorewa.  Adesugba ya kara bayyana godiyar kungiyar ga Dangote bisa dogon lokaci na hulda da hadin gwiwa da ACCI, yana mai bayyana wannan hadin gwiwa a matsayin muhimmin dandali wajen karfafa al’ummar ’yan kasuwa da bunkasa damammakin tattalin arziki.  Ranar Musamman ta Dangote ta hada shugabannin ’yan kasuwa, wakilan gwamnati, masu zuba jari, masu baje koli, ’yan kasuwa da sauran masu ruwa da tsaki, a matsayin wani bangare na shirye-shiryen da ake gudanarwa a Baje Kolin Kasuwanci na kasa da kasa na Abuja.  Shi ma da yake magana a Ranar Musamman ta Dangote, Mataimakin Shugaban Farko na kungiyar ’Yan Kasuwa ta Abuja (ACCI), Farfesa Adebisi Adesugba, ya yaba wa Kamfanonin Dangote bisa gudummawar da suke bayarwa ga ci gaban tattalin arzikin Nijeriya.  Adesugba, wanda ya wakilci Shugaban ACCI, Emeka Obegolu, SAN, ya ce dogon hadin gwiwar da ke tsakanin Dangote da kungiyar ya nuna muhimmiyar rawar da kamfanoni masu daukar nauyi ke takawa wajen habaka kasuwanci, zuba jari da harkokin kasuwanci a Nijeriya da ma yankin Afirka baki daya.  Ya lura cewa jarin da Dangote ya zuba a fannoni masu muhimmanci, ciki har da siminti, takin zamani, noma, tace man fetur da sinadaran petrochemical, ya taimaka wajen karfafa karfin samar da kayayyaki a cikin gida, samar da guraben ayyukan yi, rage dogaro da kayayyakin da ake shigowa da su daga kasashen waje da kuma taimakawa wajen samar da kudaden waje. ...

Daga dogaro da kai zuwa hadin gwiwa, daga amfani da abin da aka samar zuwa samarwa da kanmu, sannan daga daidaita kanmu da abin da ake da shi zuwa mallakar abubuwan da muka samar. Afirka ba ta rasa dabaru, hazaka, kirkire-kirkire ko damar magance matsalolinta da kanta ba. Abin da galibi muka rasa shi ne yarda da jajircewa wajen samar da hanyoyin magance matsaloli wadanda aka tsara su yadda ya kamata bisa la’akari da halin da muke ciki, tare da ba su goyon bayan da suke bukata domin su bunkasa.  Wannan ba hujjar ka’ida ba ce kawai a gare ni. Ta samo asali ne daga kwarewata wajen samar da hanyoyin fasaha a Nijeriya da kuma yin aiki tare da cibiyoyi wadanda dole ne su gudanar da ayyukansu bisa la’akari da yanayin da muke ciki. Ta hanyar wannan aiki, na ga muhimmancin tsara fasaha bisa la’akari da mutane, ababen more rayuwa, hanyoyin gudanar da aiki da kuma yanayin tattalin arzikin da aka tsara fasahar domin ta yi wa hidima. Wannan kwarewa ta kara karfafa imanin da nake da shi cewa Afirka ba za ta tsayawa kawai wajen amfani da fasaha ba; dole ne mu kara zama masu kirkirarta da mallakarta.   “Babbar hanyar magance matsalolin Afirka ita ce hanyar da ’yan Afirka suka samar. Dole ne mu gina, mu mallaki kuma mu dore kan hanyoyin magance matsalolin da aka tsara su bisa yanayinmu; bai kamata kawai mu rika shigo da hanyoyin da aka tsara su domin yanayin wasu ba.”   Wannan ba yana nufin cewa bai kamata mu koyi darasi daga sauran sassan duniya ba ne. Akasin haka, Afirka ya kamata ta koyi darasi, ta yi hadin gwiwa, ta rungumi fasahohin da suke da amfani, sannan ta amfana da ilimin duniya. Amma koyo da wasu bai kamata ya zama abin dogaro na dindindin kan hanyoyin magance matsaloli da aka samar domin wuraren da suke da al’adu, tattalin arziki, ababen more rayuwa, cibiyoyi da kalubale daban da namu ba.   Hanyar magance matsala da ke aiki yadda ya kamata a wani wuri, na iya kasa aiki a Afirka ba tare da an yi mata gagarumin gyara da daidaitawa da yanayinmu ba.   kalubalen da muke fuskanta galibi na musamman ne. Daga fannin ilimi da kiwon lafiya zuwa noma, sufuri, ayyukan kudi, fasaha, tsaro da gudanar da harkokin gwamnati, yanayin Afirka na bukatar tunanin ’yan Afirka. Muna bukatar hanyoyin magance matsaloli da suka fahimci al’ummominmu, ababen more rayuwarmu, kasuwanninmu, harsunanmu, albarkatunmu da kuma yadda al’ummarmu ke rayuwa da gudanar da ayyukansu a zahiri.  Abu mafi muhimmanci shi ne, bai kamata mu tsaya kawai wajen amfani da hanyoyin magance matsaloli ba; dole ne mu zama masu kirkirarsu da mallakarsu.   Lokacin da masu habaka fasaha na Afirka suka samar da fasahar Afirka, ’yan kasuwar Afirka suka kirkiri harkokin kasuwancin Afirka, masu binciken Afirka suka nemo hanyoyin magance kalubalen Afirka, sannan cibiyoyin Afirka suka zuba jari a kirkire-kirkiren Afirka, muna samar da fiye da kayayyaki kawai. Muna samar da ilimi, ayyukan yi, hakkin mallakar fasaha, kwarewa da kuma, 'yancin dogaro da kanmu na dogon lokaci.   Manufar bai kamata ta kasance kin duk wani abu na kasashen waje ba. Manufar ita ce mu sauya daga dogaro zuwa hadin gwiwa, daga amfani da abin da aka samar zuwa kirkirawa da kanmu, sannan daga karbar hanyoyin da wasu suka samar zuwa mallakar su. Afirka tana da matasa masu yawa kuma adadinsu na karuwa, wadanda kuma suke kara dogaro da fasaha. Wannan babbar dama ce. Bai kamata karni na gaba ya taso da imanin cewa duk wata muhimmiyar hanyar magance matsala dole ne ta fito daga wajen nahiyar ba.   Ya kamata su ga kansu a matsayin injiniyoyi, masana kimiyya, ’yan kasuwa, masu bincike, masu zane-zane, masu kirkire-kirkire, masu tunani mai zurfi da masu iya magance matsaloli, wadanda za su iya kirkirar hanyoyin da za su amfani Afirka, daga baya kuma duniya baki daya.   Haka kuma, ya kamata a gina hanyoyin magance matsalolin Afirka ta yadda za su dore. Samar da wani samfur ko fasaha mataki ne na farko kawai. Dole ne mu gina kwarewar da za ta ba mu damar kula da hanyoyinmu, inganta su, samar da kudaden gudanar da su da kuma fadada amfani da su.  Mallaka na nufin daukar nauyi. Yana nufin zuba jari wajen baiwar ’yan kasa, habaka cibiyoyi, kare hakkin mallakar fasaha, da kuma samar da yanayin da kirkire-kirkire za su iya rayuwa kuma su ci gaba ko da wadanda suka fara su sun daina jagorantar su.   Kuma idan wata hanyar magance matsala da aka kirkira a Afirka ta yi nasara, bai kamata amfaninta ya tsaya a Afirka kawai ba. Hanyar da aka tsara bisa yanayin Afirka na iya zama hanyar magance matsalar duniya baki daya a karshe. Yawancin kalubalen da Afirka ke fuskanta karancin albarkatu, yawan matasa, karancin ababen more rayuwa, karancin shigar da mutane cikin harkokin kudi, matsalolin samun ilimi da kuma al’ummomin da ke warwatse ba kalubalen Afirka kadai ba ne.  Wani lokaci, warware wata matsala mai wahala da Afirka ke fuskanta na iya haifar da daya daga cikin hanyoyin magance matsaloli mafi kirkira da ban mamaki a duniya.  Shi ya sa dole ne mu yi imani da damar da muke da ita ta kirkira.  Dole ne mu gina ba don sauran duniya ta gaza taimaka mana ba, sai don mun fahimci yanayinmu sosai har za mu iya kirkirar wani abu da ya fi dacewa da wannan yanayin.  Makomar Afirka bai kamata ta kasance kawai makoma ce da ’yan Afirka za su samu damar amfani da hanyoyin magance matsaloli da duniya ta samar ba.  Ya kamata ta kasance makoma ce da Afirka za ta kasance daya daga cikin wuraren da ake kirkirar hanyoyin magance matsalolin duniya.  Makoma ce da ba za mu tsaya kawai wajen daidaita fasaha da yanayinmu ba, sai dai mu taka rawa wajen tsara yadda za ta kasance. Inda ba za mu kasance masu amfani da kirkire-kirkire kawai ba, sai dai mu ba da gudummawa wajen samar da su. Inda ba za mu kasance masu shiga cikin tattalin arzikin fasahar duniya kawai ba, sai dai mu gina, mu mallaki kuma mu dore da kayayyaki, ilimi, kamfanoni da hakkin mallakar fasaha da ke taka muhimmiyar rawa wajen tsara wannan tattalin arziki.  Dole Afirka ta gina bisa yanayin da take ciki, tare da burin samar da abubuwan da za su amfani duniya baki daya.  Nafiu Yakubu kwararren mai gina fasaha ne kuma mai kirkire-kirkire da ke aiki a fannoni daban-daban da suka hada da ilimi, basirar wucin gadi, fasahar gajimare, tsarin dijital da kuma fasahohin da ke tasowa. Ayyukansa sun fi mayar da hankali kan samar da hanyoyin fasaha masu amfani a aikace, gina kayayyakin dijital da kuma amfani da fasaha wajen magance kalubalen da ake fuskanta a zahiri.  

Kungiyar ‘Yan Asalin Jihar Kebbi Mazauna Abuja, wato ‘Association Of Kebbi State Indiginous Residents In Abuja’, (AKIRA) ta kaddamar da...

Jihar Katsina Da UNICEF Sun Ceto Rayuwar Yara Ta Hanyar Samar Da Abinci Mai Gina Jiki

Yadda Tinubu Ya Kashe Naira Biliyan 37.64 A Tafiye-tafiye

Ta’addaci: Mutum 14,500 Sun Bace A Arewa Maso Gabas

Cin Hanci Da Rashin Gaskiya Ne Ke Rage Mutuncin ‘Yansandan Nijeriya — Rahoto

Kyamar Baki: Tinubu Ya Yi Karar Afirka Ta Kudu A Gaban Kungiyar Tarayyar Afirka

Gwamnatin Tarayya Ta Nemi Hadin Kan Al’umma Don Kawo Karshen Matsalar Tsaro