Bankin Duniya ya amince zai bai wa Nijeriya sabon rancen dala biliyan 1.25 a ƙarƙashin shirin NAIJA domin tallafawa wajen zuba jari da samar da ayyukan yi.
An sanar da amincewar ne tare da ƙaddamar da sabon tsarin haɗin gwiwa tsakanin Bankin Duniya da Nijeriya na shekarun 2026 zuwa 2032.
Bankin ya ce kuɗin za su taimaka wajen samar da ayyukan yi, bunƙasa kasuwanci, inganta wutar lantarki, faɗaɗa intanet, inganta harkokin lafiya da kuma haɓaka noma.
Daraktan Bankin Duniya a Nujeriya, Mathew Verghis, ya ce manufar shirin ita ce tabbatar da cewa sauye-sauyen tattalin arziƙin da aka fara sun samar da ci gaba a rayuwar ‘yan Nijeriya ta hanyar jawo masu zuba jari da samar da ƙarin ayyukan yi.
Bankin ya ƙara da cewa kuɗin za su kuma tallafa wajen gyare-gyare a fannin wutar lantarki, tattalin arziƙin zamani, noma, kasuwanci da kuma ƙara samar da kuɗaɗen shiga na gwamnati.
Sai dai wannan mataki ya haifar da ce-ce-ku-ce kan ƙaruwar basussukan da Nijeriya ke karɓowa.
Wasu ‘yan Nijeriya na ganin gwamnati na ci gaba da karɓar rance daga ƙasashen waje duk da matsin tattalin arziƙin da al’umma ke fuskanta.
Alƙaluman Hukumar Kula da Basussuka ta Ƙasa (DMO), ta fitar ya nuna cewar bashin da Bankin Duniya yake bin Nijeriya ya ƙaru daga dala biliyan 17.81 a ƙarshen shekarar 2024 zuwa dala biliyan 19.89 a ƙarshen shekarar 2025, lamarin da ya sa Bankin Duniya ya kasance mafi girman wanda yake bai wa Nijeriya rance a cikin cibiyoyin kuɗi na duniya.
