Tsohon kyaftin ɗin Real Madrid, Dani Carvajal, zai bar ƙungiyar a ƙarshen wannan kakar wasa bayan shafe shekaru 23 yana taka leda a Santiago Bernabeu. Ɗan wasan mai shekaru 34 ya buga wasanni 450 a Madrid inda ya ci ƙwallaye 14, yayin da kwantiraginsa zai kare a ƙarshen watan Yuni.
Carvajal na daga cikin fitattun ’yan wasan baya na gefen dama a tarihin ƙwallon kafa, musamman a tsakanin shekarun 2014 zuwa 2023, inda ya taka muhimmiyar rawa wajen nasarorin da ƙungiyar ta samu. Ya shiga makarantar horas da matasan ’yan wasan Real Madrid a shekarar 2002 kafin daga bisani ya fara bugawa babbar ƙungiyar wasa a 2013 bayan ya yi kaka guda a Bayer Leverkusen.
A tsawon zamansa a Santiago Bernabeu Stadium, Carvajal ya lashe kofuna 27, ciki har da gasar UEFA Champions League sau shida, abin da ya sanya shi cikin ’yan wasa biyar kacal da suka taba yin irin wannan tarihi.
Haka kuma ya lashe La Liga sau hudu, Copa del Rey sau biyu, da gasar cin kofin duniya ta kungiyoyi sau shida. Baya ga haka, ya lashe UEFA Super Cup sau biyar da kuma Spanish Super Cup sau hudu.
