Sa’o’i kaɗan bayan wallafa zarge-zargen nasa, mai rajin al’umma Basharu Altine Guyawa Isa ya sake wallafa wani bidiyo a shafinsa na Facebook da safiyar Lahadi, wanda ya yi iƙirarin cewa yana nuna wasu daga cikin sabbin makaman da Bello Turji ya mallaka.
A wani saƙo da ya wallafa tare da bidiyon, Basharu ya yi zargin cewa Turji ne ya fitar da bidiyon a ranar 20 ga Yuni, 2026, kuma ya ƙunshi hotunan wasu daga cikin makaman da ya ambata a rahotonsa na baya.
Ya kuma yi iƙirarin cewa Turji ya yi amfani da bidiyon ne wajen nuna abin da ya bayyana a matsayin nasarorin da mayaƙansa suka samu kan jami’an tsaro da ke aiki a hanyar Isa–Bargaja.
Jaridar Daily Trust ta ruwaito cewa sojoji uku sun rasa rayukansu, yayin da wasu da dama suka jikkata bayan wata na’urar fashewa ta IED ta tashi a ƙarƙashin motar sojoji da ke kan hanyarsu ta zuwa ƙauyen Bargaja a Ƙaramar Hukumar Isa ta Jihar Sakkwato.
An ce sojojin na amsa kiran gaggawa ne bayan wani harin ƴan bindiga da aka kai wa al’ummar yankin da sanyin safiyar Asabar.
Mazauna yankin sun shaida wa Daily Trust cewa ƴan bindigar sun mamaye ƙauyen tsakanin ƙarfe 12:30 na dare zuwa 3:00 na safe, suna harbe-harbe ba ƙaƙƙautawa, lamarin da ya sa mazauna suka nemi taimakon sojoji.
Wani mazaunin yankin da ya nemi a sakaya sunansa ya yi zargin cewa maharan sun dasa na’urar fashewar IED a kan hanyar Isa zuwa Bargaja kafin isowar sojojin.
A cikin bidiyon da aka ce Turji ya fitar bayan faruwar lamarin, ya yi iƙirarin cewa yana farin ciki da kashe wasu daga cikin waɗanda ya kira maƙiyansa.
Sai dai, ba a iya tabbatar da sahihancin zarge-zargen da ke cikin saƙonnin Facebook da kuma bidiyon ta wata hanya mai zaman kanta ba har zuwa lokacin haɗa wannan rahoto.
Har zuwa lokacin kammala rahoton, rundunar sojoji da ta ƴansanda ba su fitar da wata sanarwa kan lamarin ba.
Ƙoƙarin jin ta bakin Kakakin Rundunar Ƴansandan Jihar Sakkwato, DSP Ahmad Rufai, bai yi nasara ba, domin bai amsa kiran waya, saƙonnin rubutu ko na WhatsApp da aka aika masa ba.
Sai dai wasu majiyoyi na kusa da rundunar sojoji sun ce jami’an tsaro suna da masaniya kan bayanan sirrin da aka samu, kuma suna ci gaba da tantance halin da ake ciki.
Majiyar ta tabbatar da cewa hukumomin tsaro na ɗaukar matakan da suka dace domin tabbatar da tsaron rayuka da dukiyoyin al’umma. Taswirar Jihar Sakkwato da aka yi wa alamar ja na nuna ƙaramar hukumar da harin ya faru
Ta’addancin Turji
Bello Turji, wanda ake ɗauka a matsayin ɗaya daga cikin fitattun shugabannin ƴan bindiga da ke aiki a Arewa maso Yammacin Nijeriya, an daɗe ana danganta shi da hare-hare masu muni, garkuwa da mutane masu yawa da kuma artabu da jami’an tsaro, musamman a jihohin Sakkwato da Zamfara.
A watan Yulin 2021, an ruwaito cewa Turji ya yi garkuwa da sama da mutane 200, ya kashe mazauna ƙauyuka 63 tare da ƙona gidaje sama da 338 a Ƙaramar Hukumar Shinkafi ta Jihar Zamfara.
Rahotanni sun ce an kai harin ne domin matsa wa hukumomin tsaro lamba su saki mahaifinsa, wanda aka tsare bisa zargin yana da alaƙa da ayyukan ta’addancin ɗansa.
Bayan watanni biyu, a watan Satumban 2021, Turji ya sake kai wani babban hari a Ƙaramar Hukumar Sabon Birni ta Jihar Sakkwato.
Harin ya tilasta wa mazauna fiye da ƙauyuka 14 barin gidajensu, yayin da aka sace shanu sama da 1,000.
Rahotanni sun nuna cewa mazauna da dama sun tsallaka zuwa Jamhuriyar Nijar domin neman mafaka a garin Maradi.
Ɗaya daga cikin hare-haren baya-bayan nan da ake dangantawa da Turji shi ne harin da aka kai sansanin haɗin gwiwar sojoji da ake kira Burkusuma Camp da ke ƙauyen Dama a Ƙaramar Hukumar Sabon Birni.
Ƙauyen Dama na daga cikin wuraren da Turji da mabiyansa suka sha kai hare-hare.
A yayin harin, an ruwaito cewa jami’an tsaro da dama sun rasa rayukansu, an ƙona motocin sojoji, sannan maharan suka kwashe bindigogi da sauran kayan aikin soja.
Rahotanni sun ce lamarin ya tilasta wa sojojin da ke sansanin janyewa zuwa Basira, wani ƙauyen kan iyaka da Jamhuriyar Nijar.
Daga baya, rundunar sojin Nijeriya ta danganta harin da mayaƙan ƙungiyar ISWAP (Islamic West Africa Proɓince).
A watan Yunin 2025, an kuma ruwaito cewa mayaƙan Turji sun kashe wasu jami’an tsaro a wani kwanton ɓauna da suka yi kusa da Ƙaramar Hukumar Shinkafi ta Jihar Zamfara.
Wani mai nazarin harkokin tsaro, Bakatsine, ya yi zargin cewa maharan sun kuma ƙona wata motar sojoji a lokacin harin.
Ya kuma yi iƙirarin cewa Turji ya fitar da wani bidiyo da ke nuna yadda aka kashe wani tsohon ɗan bindiga mai suna Bashari Maniya, wanda ya zarge shi da haɗa kai da jami’an tsaro bayan ya daina ayyukan ta’addanci.
Tun da farko, a watan Satumban 2024, wani bidiyo ya bazu a kafofin sada zumunta inda aka ga Turji da mayaƙansa suna murnar ƙone wasu motocin sojojin Nijeriya guda biyu masu kariya daga nakiyoyi (MRAP) a Kwashabawa, Ƙaramar Hukumar Zurmi ta Jihar Zamfara.
A cikin bidiyon, an ga ƴan bindigar suna nuna motocin da aka lalata suna kuma rera taken nasara, yayin da Turji ya yi iƙirarin cewa ƙungiyarsa ta ƙwace motocin sojoji tare da yin barazana ga jami’an tsaro.
