Kwanan nan, an kammala gina babbar gadar Oporoma a jihar Bayelsa ta Najeriya kuma aka kaddamar da ita. Wannan gada mai tsawon mita 630 wadda kamfanin China Civil Engineering Construction Corporation (CCECC) ya gina, ta ratsa kogin Nun, wani reshe na kogin Neja.
Gadar wadda ita ce mafi girma a jihar Bayelsa, tana da matukar muhimmanci wajen hade babban birnin jihar Bayelsa, wato Yenagoa, da shalkwatar karamar hukumar kudancin Ijaw, wato Oporoma.
Ga mazauna yankin kudancin Ijaw, muhimmancin wannan gada tana da ma’ana ta musamman, domin wannan yanki mai cike da koguna da rafuka ya dade yana dogara sosai kan hanyoyin ruwa domin zirga-zirga, wanda ke haifar da wahalar tafiya da tsadar jigilar kaya, inda hakan yake kawo cikas ga ci gaban tattalin arzikin yankin.
Amma Gadar Oporoma ta daidaita wannan matsala, kana ta inganta aikin jigilar amfanin gona da tafiye-tafiyen mazauna yankin cikin sauki.A wurin bikin kammala aikin, shugaban Najeriya Bola Tinubu ya bayyana cewa, gadar Oporoma ta inganta zirga-zirgar yankin sosai, baya ga samar da ayyukan yi da kyautata yanayin rayuwar mazauna.
Hakika, wannan misali ne na yadda hadin gwiwar Sin da kasashen Afirka ta fannin aikin gina ababen more rayuwa ke amfanar da jama’a.Daga layin dogo na tsakanin Tanzania da Zambia zuwa gadar Oporoma, Sin ta kasance abokiyar gina Afirka mafi aminci a cikin fiye da rabin karni da ya gabata.
Ba tare da sanya sharuddan siyasa ba, ba tare da tsoma baki cikin harkokin cikin gida ba, Sin tana mai da hankali ne kawai kan abubuwan da jama’ar kasashen Afirka ke bukata da kuma ci gaban da suke nema, kuma wannan shi ne sirrin dorewa da ingancin hadin gwiwar Sin da Afirka.
Wannan gada, ba wai kawai ta hada gefen kogi biyu ba ce, har ma ta hada zukatan mutanen Sin da Afirka. Yayin da motoci ke ta zirga-zirga a kan gadar Oboroma, kuma musayar al’amura tsakanin gefen biyu ke kara yawaita, an yi imani cewa: Abotar Sin da Afirka tana da karfi kamar wannan gada, kuma makomar hadin gwiwar Sin da Afirka za ta kara haske.(Marubuci: MINA)
