Muhammad Bashir Gwamnan Jihar Gombe, Muhammadu Inuwa Yahaya, ya amince a hukumance da tsayawa takarar Sanatan Gombe ta Arewa a ƙarƙashin jam’iyyar APC.
An miƙa masa fom ɗin takarar ne a wani taron manyan masu ruwa da tsaki na jam’iyyar da aka faɗaɗa, wanda ya samu halartar masu neman takarar gwamna da na Majalisar Tarayya, mambobin Kwamitin Ayyuka na Jiha, dattawan jam’iyya da sauran jiga-jigan ‘yan siyasa.
Haka kuma, taron ya samu halartar Mataimakin Sakataren Kuɗi na Ƙasa na jam’iyyar APC, Hamma Adama Ali Kumo, da jami’an yankin Arewa maso Gabas na jam’iyyar, tare da sauran manyan masu ruwa da tsaki.
A matsayin shi kaɗai ɗan takara, an tabbatar da Gwamna Inuwa Yahaya a matsayin ɗan takarar jam’iyyar, inda aka miƙa masa fom ɗin a hukumance ta hannun Mataimakin Sakataren Kuɗi na Ƙasa tare da Shugaban APC na Jihar Gombe, Mohammed Dantata Ndus.
