Gwamnatin Tarayya ta ƙaddamar da tura motocin bas na alfarma guda 40 da ke amfani da iskar gas ta CNG, tare da baburan adaidaita sahu guda 200 zuwa Jihar Kano. Wannan mataki na ɗaya daga cikin shirye-shiryen inganta tsarin sufuri na zamani (Presidential CNG Initiative) da nufin samar da sauƙi ga al’ummar jihar baki ɗaya, musamman bayan janye tallafin man fetur da ya janyo tsadar rayuwa da na tafiye-tafiye.
Ƙaddamar da wadannan ababen hawa a birnin Kano ya zo ne a matsayin tallafi ga ɓangaren sufuri na jihar, inda za a raba baburan adaidaita sahu na CNG ga ƙungiyoyin matasa da matuƙa ababen hawa domin samar musu da hanyoyin dogaro da kai. Shugabannin shirin sun bayyana cewa yin amfani da iskar gas ta CNG zai rage kuɗin da matuƙa ke kashewa wajen sayen mai da kusan kashi 60 cikin dari, sannan zai kawo sauƙin kuɗin mota ga talakawa.
Hukumomin Jihar Kano sun nuna farin cikinsu da wannan haɗin gwuiwa daga gwamnatin tarayya, inda suka bayyana cewa Kano a matsayinta na cibiyar kasuwanci ta Arewa tana buƙatar irin waɗannan ayyuka na more rayuwa. An riga an samar da sansanonin musamman da za su rika sauya wa motoci tsarin amfani da gas, tare da wuraren da za a riƙa sayar da iskar gas din ta CNG cikin sauki a faɗin jihar.
A ƙarshe, gwamnatin ta buƙaci matuƙa da ƙungiyoyin sufuri da za su amfana da waɗannan motoci da adaidaita sahu da su kula da su yadda ya kamata domin ɗorewar shirin. Wannan yunƙuri na ci gaba da bazuwa zuwa sauran jihohin ƙasar nan domin gina ingantaccen tsarin sufuri mai tsafta, wanda ba ya gurɓata muhalli kuma yake da araha ga ƴan kasa.
