Assalamu alaikum masu karatu barkanmu da sake haduwa da ku a cikin shirinmu mai farin jina da albarka na Uwargida Sarautar Mata.
A yau shafin namu za mu tattauna akan batutuwa 13 da ya shafi rayuwar zamantakewa tsakanin maji da matarsa:
1. Ka rage muryarka
Karka dakawa mata tsawa, saboda ita ba yarinya bace.
Daga murya idan kana yi wa matarka fada wannan ya kan kawo raini tsakaninku, daga muryar ne sai ka ga idan yau ka yi ta yi shiru, gobe ma haka jibi sai ka ga tana kokarin mayar maka da magana saboda fada ba ya gyara sai dai ya bata, koda kuwa ba mara kunya bace, yau da gobe sai ka ga ka koya mata tana maida maka kana fada tana fada.
Idan har haka yana kasancewa a tsakaninku to fa wata rana ba zai haifar muku da da mai ido ba, sannan kuma a zo a yi abin da za’a yi da na sani, to kun ga yawan fada ko tsawa wasu ma har duka gaskiya bashi da amfani, don duk hakurin mace wata rana sai ka kai ta bango, kuma idan gidansu aka ji ba lallai ne su dauka ba saboda kana walakanta musu ‘yarsu, shi aure ba ka yi shi ne saboda tozarci ba.
Sannan kuma ba baiwa ka dauko ba itama ‘ya ce mai ‘yanci kuma tana da hakki a kanka. Amma idan ka iya yi mata gyara cikin nutsuwa da kwanciyar hankali babu fada ko tsawa kai kanka za ka ji dadin rayuwar aurenka, sannan kuma za ka mallaki matarka cikin ruwan sanyi, za ka ga koda yaushe tana kokarin ta faranta maka rai kuma duk abin da ta san ranka ba ya so za ka ga tana ta kokarin kauce masa saboda ba ta san bacin ranka.
Amma idan ya zama dole babu yadda ta iya saboda idan ka ga abin da ba daidai ba za ka kira ta daki ku zauna ka fahimtar da ita cewa wannan abin ba daidai bane, ka gwada mata cikin nutsuwa har ka yi mata wasa ‘yar soyayya, za ka ga kun samu fahimtar juna ba tare da ranta ya baci ba kai ma ba tare da naka ran ya baci ba sai fa kaso ranka zai baci, mumuke bata rammu a banza wani abin ma bai kai na hakan ba ka dora wa kanka bacin rai.
2: A yi shi Cikin Soyayya:
Ita rayuwar aure ya kama duk abin da za ku yi ku yi shi cikin soyayya, shi kansa gyara ku rika yin sa cikin so da kauna, duk abin da ta yi ba daidai ba ka gyara mata cikin so da kauna cikin nishadi za ka ga yadda za ta rika ji da kai saboda ta san kana sonta kuma kana mutunta ta, sannan kuma ba ka son bacin ranta.
Ita rayuwa da kuke gani sai da siyasa kake samun abin da ranka yake so ko karamin yaro ne idan ka fiya yawan hantarar sa sai ka ga yana neman bijire maka, amma idan ka ja shi a jikinka sai ka ga ka samu abin da kake so to ballantana babba. Allah ya sa mu dace.
