Ɗaliban makarantun sakandare da na manyan makarantun gwamnati a faɗin Nijeriya na ci gaba da jiran fara samun kyautar ‘data’ ta intanet mai nauyin megabyte 100 (100MB) a kowace rana, wadda Gwamnatin Tarayya ta yi alƙawarin fara bayarwa daga ranar 1 ga watan Oktoba.
Shirin, wanda aka ƙaddamar a ƙarƙashin tsarin samar da damar shiga shafukan ilimi kyauta (Zero-Rated Data Access to Approved Educational Platforms), na da nufin sauƙaƙa wa ɗalibai tsadar hawan intanet domin gudanar da bincike, ɗaukar darussa a yanar gizo, da samun kayan karatu ba tare da biyan kuɗi ba.
A yayin da ɗalibai da iyaye a makarantu da dama suka bayyana cewa har yanzu ba su fara cin gajiyar datar ba kamar yadda aka tsara, Hukumar Sadarwa ta Nijeriya (NCC) ta fayyace cewa an keɓance amfani da kyautar datan ne kawai ga shafukan intanet da manhajojin ilimi da aka tantance kuma aka amince da su a ƙarƙashin shirin.
Babban Jami’in Hukumar NCC, Dakta Aminu Maida, ya bayyana cewa shirin haɗin gwiwa ne tsakanin hukumar, da Ma’aikatar Ilimi ta Tarayya, da Ƙungiyar Masu Kamfanonin Sadarwa ta Ƙasa (ALTON), da nufin tallafa wa ƙudurin Shugaba Bola Ahmed Tinubu na haɓaka ƙwarewar fasahar zamani da ilimin ƴan ƙasa.
A ƙarshe, ɗalibai da masu ruwa da tsaki a fannin ilimi sun buƙaci hukumomin da abin ya shafa da su fito su yi ƙarin haske tare da bayar da cikakken bayani kan yadda za a shiga shafukan da aka amince da su cikin sauƙi, domin tabbatar da an cimma muradun da aka kafa shirin a kansu.
