Tsohon ɗan takarar shugaban ƙasa kuma tsohon gwamnan Jihar Anambra, Mista Peter Obi, ya fito fili ya sake nanata matsayinsa na goyon bayan cire tallafin man fetur a Najeriya. A cikin wani jawabi da ya gabatar kwanan nan, Obi ya jaddada cewa tsarin biyan tallafin man fetur ya daɗe yana zama wata babbar kafa ta cin hanci da rashawa wanda ke ci gaba da yi wa tattalin arzikin kasar zagon-kasa.
Obi ya bayyana cewa tun a baya yana kan bakar sa ta cewa ba zai yiwu gwamnati ta ci gaba da cinwo basussuka daga kasashen waje domin kawai ta raba wa ‘yan kasa tallafin man fetur na karya ba. A cewarsa, wadannan makudan kuɗaɗe da ake salwantarwa a karkashin sunan tallafi, ya kamata a ce an karkata su ne zuwa muhimman bangarorin da za su taimaka wajen gina kasa, kamar inganta harkar ilimi, kiwon lafiya, gami da samar da ayyukan yi ga dimbin matasa.
Duk da goyon bayansa ga manufar cire tallafin, tsohon gwamnan ya nuna matuƙar damuwarsa kan yadda gwamnati mai ci a yanzu ta zartar da lamarin gaba ɗaya ba tare da samar da ingantattun matakan rage radadi ga talakawa ba. Ya nuna cewa kamata ya yi a tsara fitar da tsarin a hankali tare da tabbatar da cewa an samar wa ‘yan kasa ainihin ababen more rayuwa da za su taimaka musu fuskantar kuncin da zai biyo baya, ba kawai a cire shi lokaci guda a jefa mutane cikin ukuba ba.
Daga ƙarshe, Obi ya buƙaci shugabanni da su kasance masu gaskiya da riƙon amana wajen sarrafa kuɗaɗen da ake tarawa sakamakon cire tallafin. Ya yi kira ga gwamnati da ta tabbatar cewa an zuba waɗannan kuɗaɗe wajen farfado da masana’antu da kuma tallafawa rayuwar ‘yan Nijeriya, domin gujewa sake salwantar da kuɗaɗen zuwa aljihun ‘yan tsiraru masu fada a ji.
